ការវាយប្រហាររបស់អ៊ីស្រាអែល បានសម្លាប់ពលរដ្ឋប៉ាឡេស្ទីនយ៉ាងហោចណាស់បួននាក់ រួមមានទាំងក្មេងស្រីអាយុ១៣ឆ្នាំម្នាក់ និងធ្វើឱ្យមនុស្សជាច្រើនទៀតរងរបួសនៅតំបន់ហ្កាហ្សា ខណៈអ៊ីស្រាអែល បានបន្តវាយប្រហារលើតំបន់ហ៊ុមព័ទ្ធមួយនេះ និងពង្រីកការវាយឆ្មក់នៅទូទាំងតំបន់កាន់កាប់ West Bank ។

ទីភ្នាក់ងារសារព័ត៌មានប៉ាឡេស្ទីន Wafa បានរាយការណ៍កាលពីថ្ងៃអាទិត្យថា យានដ្រូនរបស់អ៊ីស្រាអែលមួយគ្រឿងបានវាយប្រហារតំបន់ al-Salatin ភាគខាងលិចទីក្រុង Beit Lahiya ភាគខាងជើងតំបន់ហ្កាហ្សា ដោយបានសម្លាប់មនុស្សយ៉ាងហោចណាស់ពីរនាក់ និងធ្វើឱ្យមនុស្សយ៉ាងហោចណាស់ម្នាក់ទៀតរងរបួស។ នៅភាគខាងត្បូងតំបន់ហ្កាហ្សា កងកម្លាំងអ៊ីស្រាអែលបានទម្លាក់គ្រាប់បែកលើជំរំតង់មួយកន្លែងដែលផ្តល់ទីជម្រកដល់ពលរដ្ឋប៉ាឡេស្ទីនដែលភៀសខ្លួនក្នុងទីក្រុង Khan Younis។ យន្តហោះចម្បាំងអ៊ីស្រាអែល បានបាញ់មីស៊ីលទៅលើជំរំតង់ បណ្តាលឱ្យមនុស្សច្រើននាក់រងរបួស។

គណៈកម្មាធិការកាកបាទក្រហមអន្តរជាតិ (ICRC) បាននិយាយថា ខ្លួនបានជួយផ្ទេរពលរដ្ឋប៉ាឡេស្ទីន១៤ នាក់ដែលត្រូវបានអ៊ីស្រាអែលចាប់ជាចំណាប់ខ្មាំងពីច្រកឆ្លងកាត់ Kerem Abu Salem ទៅកាន់មន្ទីរពេទ្យ Al-Aqsa Martyrs នៅទីក្រុងហ្កាហ្សាភាគកណ្តាល។

គណៈកម្មាធិការកាកបាទក្រហមអន្តរជាតិ (ICRC) បាននិយាយថា ខ្លួនបានសម្របសម្រួលការផ្ទេរអ្នកជាប់ឃុំឃាំងដែលត្រូវបានដោះលែងជាង ២.៥០០នាក់ចាប់តាំងពីឆ្នាំ ២០២៣ តាមរយៈយន្តការដូចគ្នា។ ប៉ុន្តែអង្គការនេះ បាននិយាយថា អ៊ីស្រាអែលមិនបានអនុញ្ញាតឱ្យខ្លួនចូលទៅជិតអ្នកជាប់ឃុំឃាំងប៉ាឡេស្ទីនដែលត្រូវបានឃុំខ្លួននៅក្នុងមណ្ឌលឃុំឃាំងអ៊ីស្រាអែល ចាប់តាំងពីខែតុលា ឆ្នាំ ២០២៣។ គណៈកម្មការនិយាយថា អាជ្ញាធរត្រូវតែបង្ហាញពីជោគវាសនា និងទីតាំងរបស់អ្នកជាប់ឃុំឃាំងទាំងអស់ អនុញ្ញាតឱ្យមានការចូលទៅសួរសុខទុក្ខ និងធានាថាពួកគេអាចទាក់ទងជាមួយក្រុមគ្រួសាររបស់ពួកគេ។