ភ្នំពេញ ៖ លោក ជា ពិសី អភិបាលខណ្ឌឫស្សីកែវ បានធ្វើការអំពាវនាវដល់បងប្អូនប្រជាពលរដ្ឋ ដែលរស់នៅខណ្ឌនេះអនុវត្តឲ្យបានខ្ជាប់ខ្ជួនបន្ថែមទៀត ជាពិសេសគឺត្រូវចូលរួមវិធាន ៣ការពារ ៣កុំ ខណៈមេរោគកូវីដ-១៩ ដ៏កាចសាហាវមួយនេះ បានបន្តរីករាលដាលខ្លាំងនៅក្នុងរាជធានីភ្នំពេញ និងក្នុងទឹកដីខណ្ឌឫស្សីកែវ ជាបន្តបន្ទាប់ហើយនោះ។
ក្នុងពិធីចុះចែកអំណោយ សម្ដេចតេជោ ហ៊ុន សែន នាយករដ្ឋមន្ត្រី នាថ្ងៃទី១៩ ខែមីនា ម្សិលមិញនេះ ជូនគ្រួសារពាក់ព័ន្ធផ្ទាល់ និងប្រយោល ជាមួយជនវិជ្ជមានកូវីត១៩ ចំនួន៤ គោលដៅនៅក្នុងទឹកដីខណ្ឌឫស្សីកែវនេះ លោក ជា ពិសី បានលើកឡើងថា បងប្អូនប្រជាពលរដ្ឋដែលកំពុងធ្វើចត្តាឡីស័ក នេះបានយល់ដឹងមកហើយ ចំពោះវិធានការ ការពារនូវមេរោគកូវីដ១៩នេះ ដោយរាជរដ្ឋាភិបាល និងក្រសួងសុខាភិបាល បានធ្វើការណែនាំជាបន្តបន្ទាប់នោះ។ ដូច្នេះដើម្បីឲ្យវិធានការនេះកាន់តែមានប្រសិទ្ធភាពបន្ថែមទៀតនោះ គឺត្រូវមានការចូលរួមពីសំណាក់បងប្អូនទាំងអស់ ទើបស្ថានការណ៍កូវីដ-១៩នេះ មិនបន្តរីករាលដាលទៅក្នុងសហគមន៍ទៀត។
លោកអភិបាលខណ្ឌ បានលើកឡើងថា «ក្នុងនាមអាជ្ញាធរ សូមបងប្អូនទាំងអស់បន្តរួមគ្នាអនុវត្តឲ្យមានត្រឹមត្រូវ និងគ្រប់ពេលវេលាទាំងអស់នូវវិធាន «៣ការពារ និង៣កុំ» របស់សម្តេចតេជោ ហ៊ុន សែននាយករដ្ឋមន្ត្រី ដែលសម្តេច បានយកចិត្តទុកដាក់ខ្ពស់ចំពោះសុខុមាលភាពរបស់បងប្អូនប្រជាពលរដ្ឋទូទៅ ហើយសម្តេច និងក្រសួងសុខាភិបាល បានអំពាវនាវជាច្រើនលើកច្រើនសារមកហើយទាក់ទង នឹងវិធានការ ការពារ នៃមេរោគកូវីដ១៩នេះ»។
លោក បន្តថា បច្ចុប្បន្នភាពនេះ ការរីករាលដាលនៃមេរោគកូវីដ១៩ បានបន្តផ្ទុះជារឿយនៅក្នុងរាជធានីភ្នំពេញ និងបណ្តាខេត្តមួយចំនួននៅប្រទេសកម្ពុជា ដែលរហូតមកដល់ពេលនេះ តាមការប្រកាសរបស់ក្រសួងសុខាភិបាល នៅប្រទេសកម្ពុជាយើងមានករណីឆ្លងមេរោគកូវីដ១៩នេះ គឺបានឡើងដល់១៦៣២នាក់ហើយ ដោយក្នុងនោះ បានធ្វើការព្យាបាលសះស្បើយចំនួន៦៩២នាក់ ខណៈអ្នកកំពុងបន្តសម្រាកព្យាបាលនៅតាមមន្ទីរពេទ្យ និងកន្លែងនានា ចំនួន៦៩២នាក់ ប៉ុន្តែអកុសល បានបណ្តាលឲ្យបាត់បង់ជីវិតចំនួន៣នាក់ ផងដែរ ដោយស្ថានភាពជំងឺរបស់ពួកគាត់បានវិវត្តន៍រកសភាពធ្ងន់ធ្ងរ ដែលយើងមិនអាច សង្គ្រោះពួកគាត់បាននោះ៕
អត្ថបទ ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
