ភ្នំពេញ៖ ក្រុមគ្រូពេទ្យប្រចាំការិយាល័យស្រុកប្រតិបត្តិពោធិ៍សែនជ័យ នៃមនី្ទរសុខាភិបាល​រាជធានី​ភ្នំពេញ បន្តយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនសិស្សានុសិស្ស​សាលាបឋម​សិក្សាជម្ពូវ័ន ទាំងដូសមូលដ្ឋាន និងដូសជំរុញ។

បើតាមលោក ចាប សុវណ្ណ ប្រធាន​កម្មវិធីផ្តល់ថ្នាំបង្ការ នៃ​ការិយាល័យ​ស្រុកប្រតិបតិ្ត​ពោធិ៍សែនជ័យ ខណ្ឌពោធិ៍សែនជ័យ រាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី២៩ ខែមេសា ឆ្នាំ២០២២នេះថា ដោយមានការចង្អុលបង្ហាញពីរដ្ឋបាលរាជធានីភ្នំពេញ និងគណៈអភិបាលខណ្ឌ ឲ្យក្រុមការងារគ្រូពេទ្យប្រចាំការិយាល័យស្រុកប្រតិបតិ្តពោធិ៍សែនជ័យ ចុះផ្តល់វ៉ាក់សាំងបង្ការជំងឺកូវីដ-១៩ ទាំងដូសមូលដ្ឋាន ដូសជំរុញទី៣ និងដូសជំរុញទី៤ នៅតាមមូលដ្ឋានសហគមន៍ ដូចជាតាមទីផ្សារ តំបន់រោងចក្រ និងខ្នងផ្ទះ (ចាក់វ៉ាក់សាំងបង្ការជំងឺកូវីដ-១៩ ប្រភេទ ស៊ីណូវ៉ាក់-អស្រ្តាហ្សេនីកា-Pfizer) សាលារៀន (ចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់) ដោយចាប់ផ្តើមយុទ្ធនាការពីថ្ងៃទី២៥ ខែមេសា ឆ្នាំ២០២២ រហូតដល់ប្រជាពលរដ្ឋក្នុងមូលដ្ឋានខណ្ឌពោធិ៍សែន ជ័យទទួលបានវ៉ាក់សាំងគ្រប់ៗគ្នា។

សិស្សានុសិស្សនៃសាលាបឋមសិក្សាជម្ពូវ័ន ដែលបានមកទទួលវ៉ាក់សាំង នៅខាងមុខទីចាត់ការ បានបង្ហាញពីការសប្បាយរីករាយ ដែលវត្តមានរបស់ក្រុមគ្រូពេទ្យ ចុះមកចាក់វ៉ាក់សាំង ផ្ទាល់ ក្នុងសាលារៀនរបស់ពួកគាត់។

ឆ្លៀតក្នុងឱកាសនោះ នាយកសាលាបឋមសិក្សា ជម្ពូវ័ន លោក រឹម រ៉េត បានឲ្យដឹងដែរថា បច្ចុប្បន្នសាលាបឋមសិក្សាជម្ពូវ័ន មានសិស្សានុសិស្សចំនួនសរុប ៣៨៧៥នាក់ ពីថ្នាក់​មត្តេយ្យ​កម្រិតទាប រហូតដល់ថ្នាក់ទី៦ ក្នុងនោះមានសិស្ស​សមាហរណកម្ម​ខ្សោយ​សតិបញ្ញា មានចំនួន១០នាក់។ ក្នុងនោះចំនួនសិស្សចាក់ដូសទី១រួច មានចំនួន៣៧៤៥នាក់, ចំនួនសិស្សចាក់ដូសទី២រួច មានចំនួន៣៧១៨នាក់ និងចំនួនសិស្សចាក់ដូសទី៣រួច មានចំនួន២០២៥នាក់។ ដោយឡែកសិស្សមកទទួលវ៉ាក់សាំងបង្ការជំងឺកូវីដ-១៩ អនុវត្តន៍តាមផែនការគោលដៅរបស់រាជរដ្ឋាភិបាល ជាពិសេសសម្តេចតេជោ ហ៊ុន សែន នាយករដ្ឋមន្រី្ត រៀបចំឲ្យបានចាក់វ៉ាក់សាំងបង្ការជំងឺកូវីដ-១៩ នៅគ្រប់សាលារៀន ហើយឲ្យសិស្សានុសិស្ស ក៏ដូចជាប្រជាពលរដ្ឋទាំងអស់ ត្រូវបានទទួលវ៉ាក់សាំងគ្រប់ដូស និងជាដូសជំរុញ សម្រាប់ទប់ស្កាត់ការរីករាលដាលជំងឺកូវីដ-១៩៕ អត្ថបទ៖ រដ្ឋា