គណបក្សប្រឆាំងវ៉េ​ណេស៊ុយអេឡាដឹកនាំដោយអតីតសមាជិកសភា និងជាម្ចាស់​ពាន​រង្វាន់ណូបែល លោកស្រី Maria Corina Machado ដែលបានរស់​នៅ​និរទេសខ្លួន បានប្រមូលផ្តុំអ្នកស្ម័គ្រចិត្តទូទាំងប្រទេសកាលពីសប្តាហ៍មុន ដើម្បីប្រមូលការ​បរិច្ចាគ សម្រាប់អ្នករស់រានមានជីវិតពីគ្រោះរញ្ជួយដី ដែលគ្មានផ្ទះសម្បែង ប៉ុន្តែវាបានជួបប្រទះនឹងឧបសគ្គមិននឹកស្មានដល់មួយ នោះគឺ នគរបាលជាតិ។

កាល​ពី​ថ្ងៃទី២៥ ខែមិថុនា ឆ្នាំ២០២៦ លោកស្រី Heidy Loicett មេដឹកនាំនៃគណបក្សប្រឆាំង Vente បានឈរនៅក្រោមក្រណាត់ពណ៌ខៀវនៅលើចិញ្ចើមផ្លូវមួយ នៅ​រដ្ឋ​ Portuguesa ជារដ្ឋមួយដែលមានចម្ងាយប្រហែល ៤៤០​គីឡូម៉ែត្រពីតំបន់គ្រោះមហន្តរាយ ខណៈដែលមនុស្សបានមកជាមួយរបស់របរជាច្រើនប្រភេទ ដូចជាខោទឹកនោម​ទារក ទឹកដប និងសម្លៀកបំពាក់ប្រើរួច។ លោកស្រី​បាននិយាយថា នគរបាល​ក៏បានមកដល់​ដែរ។

លោក​ស្រីបានពន្យល់នៅក្នុងបទសម្ភាសន៍តាមទូរស័ព្ទបន្ទាប់ពីការប្រឈម​មុខ​គ្នានោះថា មន្ត្រីនគរនបាល​ជាតិវ៉េណេស៊ុយអេឡា និងមន្ត្រីជាច្រើននាក់ មកពីទីភ្នាក់ងារការពារជនស៊ីវិលសហព័ន្ធ បានព្យាយាមរារាំង​យុទ្ធនាការសប្បុរសធម៌នេះ ដោយបន្ថែមថា លោកស្រី​ត្រូវបានគេប្រាប់ថា អំណោយទាំងអស់ត្រូវតែបញ្ជូនតាមរយៈរដ្ឋាភិបាលសហព័ន្ធ។

គួរបញ្ជាក់ថា កាលពីសប្តាហ៍មុន វ៉េណេស៊ុយអេឡា បានរងការរញ្ជួយដីដ៏អាក្រក់​ ២លើកបន្ត​គ្នា​ ដែលបានសម្លាប់មនុស្សជាង ១.៤០០នាក់ ហើយ​ជាង ៣.១៥០នាក់ បានរង​របួស​។ អ្នករិះគន់លើក​ឡើង​ថា ពួកគេខ្លាចថា ប្រធានាធិបតីស្តីទីរបស់ប្រទេសនេះ​ គឺលោកស្រី Delcy Rodriguez នឹងធ្វើឲ្យសោកនាដកម្មនេះក្លាយ​ជារឿងនយោបាយ ដោយប្រើប្រាស់ការឆ្លើយតបនឹងគ្រោះមហន្តរាយ ដើម្បីបង្កើតភាពស្របច្បាប់របស់លោកស្រី​ នៅចំណុចផ្លាស់​ប្ដូរ​ដ៏សំខាន់មួយ។

រដ្ឋាភិបាលរបស់លោកស្រី Rodriguez ដែលមិនបានឆ្លើយតបទៅនឹងសំណើសុំការអត្ថាធិប្បាយ បានបញ្ជាក់​ថា អាជ្ញាធរកំពុងព្យាយាមធ្វើ​ឲ្យមាន​សណ្តាប់ធ្នាប់ និងរក្សាតំបន់ និងផ្លូវដែលរងផលប៉ះពាល់ដោយរញ្ជួយដីឲ្យ​នៅស្រឡះល្អ ដើម្បីឲ្យ​ក្បួនរថយន្តសង្គ្រោះ និងអ្នកឆ្លើយតបបន្ទាន់ អាចធ្វើការងាររបស់ពួកគេដោយគ្មានឧបសគ្គ៕