លោកប្រធានាធិបតី Vladimir Putin បាននិយាយកាល​ថ្ងៃអាទិត្យ (ទី២៨ ខែមិថុនា ឆ្នាំ២០២៦) ថា ប្រទេស​រុស្ស៊ីនឹងបន្តទៅមុខជាមួយនឹងគោលបំណងរបស់ខ្លួន នៅ​សមរភូមិ ដោយ​ការដណ្តើមគ្រប់គ្រង​យ៉ាងពេញលេញ លើ​តំបន់ចំនួន ៤ របស់​អ៊ុយក្រែន ដោយបដិសេធអ្វីដែលលោកនិយាយថា ជាសំណើថ្មីរបស់អ៊ុយក្រែន ដើម្បីទប់ស្កាត់អរិភាព នៅក្នុងសង្គ្រាមដែលមានអាយុកាលជាង ៤ឆ្នាំហើយ​។

លោក Putin ដែល​បាននិយាយទៅកាន់ពិធិករ​របស់​ទូរទស្សន៍រដ្ឋរុស្ស៊ី ក៏បានលើក​ឡើង​ផងដែរថា រុស្ស៊ីត្រូវការបង្កើនសមត្ថភាពការពារដែនអាកាសរបស់ខ្លួន ដើម្បីទប់ទល់នឹងការវាយប្រហារដោយយានដ្រូន​របស់អ៊ុយក្រែនកាន់តែខ្លាំងឡើងៗ ដែលជា​ប្រតិបត្តិ​ការ​មានគោលបំណងចម្បង លើឧស្សាហកម្មប្រេងរបស់ខ្លួន​។ ហើយ​លោកបានបញ្ជាក់​ថា រុស្ស៊ីកំពុងដោះស្រាយបានយ៉ាង​ល្អ ក្នុងការដោះស្រាយបញ្ហាផ្គត់ផ្គង់ប្រេងឥន្ធនៈដែលទាក់ទងនឹងការវាយប្រហាររបស់អ៊ុយក្រែន។

នា​ព្រឹក​ថ្ងៃទី២៨ ខែមិថុនានោះដែរ​ ក្នុង​​កិច្ចប្រជុំមួយនៅឯ​វិមានក្រឹមឡាំង ជាមួយរដ្ឋមន្ត្រីរដ្ឋាភិបាល និងមន្ត្រីផ្សេងទៀត លោក Putin បានទទួលស្គាល់ថា ការវាយប្រហារបានបង្កឱ្យមានការខ្វះខាតប្រេងឥន្ធនៈនៅក្នុងតំបន់ផ្សេងៗរបស់​រុស្ស៊ី ប៉ុន្តែរុស្ស៊ីកំពុងដោះស្រាយជាមួយបញ្ហា​ទាំង​នោះ​។

នៅក្នុងបទសម្ភាសន៍តាមទូរទស្សន៍របស់លោក លោក Putin បាននិយាយថា អ៊ុយក្រែនបានស្នើឱ្យបញ្ឈប់ការវាយប្រហារចម្ងាយឆ្ងាយជាជំហានមួយឆ្ពោះទៅរកសន្តិភាព។ ប៉ុន្តែទីក្រុងមូស្គូបានមើលឃើញថា វាគឺ​ជាមធ្យោបាយមួយ ដើម្បីជួយ​សម្រាល​សម្ពាធលើកងកម្លាំងរបស់ទីក្រុងគីវវ នៅ​តាមបណ្តោយតំបន់​ជួរមុខប្រវែង​ ១.២៥០​គីឡូម៉ែត្ររបស់ភាគីទាំង២ ហើយការ​ស្នើនេះ​នឹងមិនផ្លាស់​ប្ដូរប្រតិបត្តិ​ការ​​ឡើយ។

ការិយាល័យរបស់ប្រធានាធិបតីអ៊ុយក្រែន លោក Volodymyr Zelenskyy មិនបានឆ្លើយតបភ្លាមៗឡើយ​ ចំពោះសំណើដែលបានដាក់ជូន អំឡុងយប់ជ្រៅ នៅអ៊ុយក្រែន ដើម្បីសុំការអត្ថាធិប្បាយ ជុំវិញ​ការកត់សម្គាល់របស់លោក Putin៕