អ្នកនាំពាក្យរដ្ឋាភិបាលជាន់ខ្ពស់របស់ទីក្រុងតូក្យូ បាននិយាយថា នាវាឆ្មាំល្បាតឆ្នេរ​របស់​ចិន បានប្រកាស​ពីការទាម​ទារ​​របស់ទីក្រុងប៉េកាំង ចំពោះព្រំដែនសមុទ្រ នៅភាគខាងកើតនៃកោះតៃវ៉ាន់ និងនៅជិតកោះរបស់ជប៉ុនមួយ ខណៈដែលភាពតានតឹងនៅតែបន្តមាន បន្ទាប់ពីជប៉ុន និងហ្វីលីពីន បានបញ្ជាក់​កាលពីខែឧសភាថា ប្រទេស​ទាំង២ ​នឹងគូសផែនទីអះអាង​សិទ្ធិ នៅក្នុងតំបន់នោះ។

អំឡុង​សន្និសីទសារព័ត៌មានប្រចាំ​ថ្ងៃ នា​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ រដ្ឋ​មន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រី លោក Minoru Kihara បានលើក​ឡើង​ថា៖ «យើងបានបញ្ជាក់ថា នាវាឆ្មាំល្បាត​ឆ្នេរ​ចិន បានធ្វើដំណើរម្តងម្កាល នៅក្នុងតំបន់សេដ្ឋកិច្ចផ្តាច់មុខរបស់ប្រទេសជប៉ុន នៅភាគខាងត្បូងនៃកោះ Yonaguni ហើយបានធ្វើការអះអាង​សិទ្ធិ​ជា​ឯកតោភាគី ទាក់ទងនឹងដែនទឹកទាំងនោះ»។

លោកបានបន្ថែមថា៖ «សកម្មភាពបែបនេះរបស់ប្រទេសចិន គឺមិនអាចទទួលយកបានឡើយ​ សម្រាប់​ប្រទេសជប៉ុន ហើយយើងបានដាក់ការ​តវ៉ាផ្លូវការ​​​ម្តងហើយម្តងទៀត តាមរយៈបណ្តាញការទូត»។

គួរបញ្ជាក់ថា កាលពីដើមខែមិថុនា ប្រទេសចិនបាន​ឲ្យ​ដឹង​ថា ខ្លួនបានចាប់ផ្តើម «ប្រតិបត្តិការអនុវត្តចរាចរណ៍ផ្លូវសមុទ្រពិសេស» នៅភាគខាងកើតនៃកោះតៃវ៉ាន់ ដើម្បីអះអាងពីយុត្តាធិការសមុទ្ររបស់ខ្លួននៅក្នុងតំបន់នោះ។ ចំណាត់ការ​នេះបានកើតឡើងបន្ទាប់ពីមេដឹកនាំជប៉ុន និងហ្វីលីពីន បាននិយាយកាលពីខែឧសភាថា ភាគី​ទាំង​២ នឹងចាប់ផ្តើមការពិភាក្សា អំពីការកំណត់ព្រំដែនសមុទ្រ។

ដោយដកស្រង់ទិន្នន័យតាមដាននាវា សារព័ត៌មាន​ Kyodo News របស់ជប៉ុនបានរាយការណ៍កាល​ថ្ងៃទី២៨ ខែមិថុនាថា នាវាឆ្មាំសមុទ្រចិន បានប្រតិបត្តិការជាប្រចាំ នៅភាគខាងត្បូងនៃកោះ Yonaguni ក្នុងខែមិថុនា ដើម្បីគាំទ្រដល់នាវាសិក្សា​ស្រាវជ្រាវពី​សមុទ្រ៕