ភាគហ៊ុនអាស៊ីបានស្ថិត​ក្នុង​ស្ថានភាព​ប្រែប្រួល​មិន​ប្រាកដ នៅថ្ងៃចន្ទ (ទី២៩ ខែមិថុនា ឆ្នាំ២០២៦) នេះ បន្ទាប់ពីអ៊ីរ៉ង់ និងសហរដ្ឋអាមេរិក បាន​យល់​ព្រម​បញ្ឈប់អរិភាពដែលបានបង្ក​ឲ្យមាន​ភាព​មិន​ច្បាស់លាស់​ដល់​កិច្ចព្រមព្រៀងសន្តិភាពបណ្តោះអាសន្ន និងជំរុញ​ឲ្យ​តម្លៃប្រេងឡើង​ខ្ពស់​។

ការវិលត្រឡប់ទៅរកការទូត នៅតំបន់​មជ្ឈិមបូព៌ា នឹងកើតឡើងបន្ទាប់ពីមាន​ការវាយប្រហារតបតគ្នាជាច្រើនថ្ងៃ ចាប់តាំងពីមីស៊ីល​របស់អ៊ីរ៉ង់ បានវាយប្រហារនាវាដឹកទំនិញ ១គ្រឿង នៅច្រកសមុទ្រ Hormuz កាលពីសប្តាហ៍មុន ដោយភាគីទាំង២ បាន​ចោទប្រកាន់គ្នាទៅវិញទៅមកថា បានរំលោភ​បទ​ឈប់បាញ់បណ្តោះអាសន្ន។

ភាគ​ហ៊ុន S&P 500 និង Nasdaq នៅសហរដ្ឋ​អាមេរិក​ បានឡើង ០,៥ភាគរយ​ ខណៈពេលដែលផ្សារហ៊ុន​តំបន់​អឺរ៉ុប បានហក់​ឡើង ០,១៣ភាគរយ​ ដែលចង្អុលបង្ហាញពីការបើក​ការ​ជួញ​ដូរដ៏​មាន​ស្ថិរភាព។ តែ​យ៉ាងណាក្ដី ទីផ្សារហ៊ុន​របស់​តំបន់​អាស៊ី បាន​ធ្លាក់​ចុះ​ ដោយ KOSPI របស់កូរ៉េខាងត្បូង ធ្លាក់ចុះជិត ២ភាគរយ​ ហើយ​ Nikkei របស់ជប៉ុន ធ្លាក់ចុះ ១ភាគរយ​ ដែលធ្វើឱ្យសន្ទស្សន៍របស់ MSCI នៃភាគហ៊ុនអាស៊ី-ប៉ាស៊ីហ្វិក ធ្លាក់ចុះ ០,៣ភាគរយ​។

លោក Nick Twidale ប្រធានយុទ្ធសាស្ត្រទីផ្សារនៅក្រុម​ហ៊ុន​ ATFX Global ក្នុងទីក្រុងស៊ីដនី ប្រទេសអូស្ត្រាលី បាននិយាយថា៖ «វាមានអារម្មណ៍ថា ទីផ្សារហ៊ុន​របស់​យើងមិន​មានទិសដៅ​ពិតប្រាកដ​។ តែ​យើងអាចនឹងទទួលបានភាព​ល្អ​ប្រសើរ​ ដោយសារតែ​​ព័ត៌មានវិជ្ជមានបន្ថែមទៀតពីតំបន់​មជ្ឈិមបូព៌ា»។

ក្ដីបារម្ភអំពីអនាគតនៃកិច្ចព្រមព្រៀងសន្តិភាព បានធ្វើឱ្យតម្លៃប្រេងហក់​ឡើង ដែលបានបោះបង់ចោលស្ទើរតែទាំងអស់នៃការកើនឡើងដែលជំរុញដោយសង្គ្រាម ខណៈដែលទីផ្សារបានកំណត់តម្លៃ​ឡើងវិញយ៉ាងឆាប់រហ័សដោយសារ​លទ្ធភាពមាន​ការធូរ​ស្រាល​លើ​ការ​ផ្គត់ផ្គង់។

នៅថ្ងៃចន្ទនេះ ប្រេងឆៅ Brent បានកាត់បន្ថយការកើនឡើងខ្ពស់​ដំបូងមកត្រឹម ០,៥ភាគរយ នៅតម្លៃ​ ៧២,៣៧ដុល្លារ ក្នុងមួយបារ៉ែល ខណៈដែលប្រេងឆៅ West Texas Intermediate (WTI) របស់សហរដ្ឋអាមេរិក បានហក់​ឡើង ១ភាគរយ ដល់តម្លៃ ៦៩,៩២ដុល្លារ ក្នុងមួយបារ៉ែល៕