កូរ៉េខាងត្បូង បានឱ្យ​ដឹង​នៅ​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ​ថា ខ្លួនកំពុងសហការ «យ៉ាងជិតស្និទ្ធ» ជាមួយសហរដ្ឋអាមេរិក ជុំវិញ​ការបាញ់មីស៊ីលរបស់កូរ៉េខាងជើង ខណៈដែលការរិះគន់ បានកើនឡើង ចំពោះការប្រកាសយឺតយ៉ាវ អំពីការបាញ់មីស៊ីលចុងក្រោយរបស់ទីក្រុងព្យុងយ៉ាង។ នេះបើយោងតាមរបាយការណ៍ពី​ប្រព័ន្ធផ្សព្វផ្សាយ។

កូរ៉េខាងជើង បានធ្វើការសាកល្បងជើង​ទម្រ​បាញ់រ៉ូកែតច្រើនគ្រាប់ថ្មី និងអាវុធសំខាន់ៗផ្សេងទៀត កាលពីថ្ងៃព្រហស្បតិ៍ ដែលត្រូវបានត្រួតពិនិត្យដោយមេដឹកនាំ លោក គីម ជុងអ៊ុន (Kim Jong Un)។

តែ​សារព័ត៌មាន Yonhap News ដែលមានមូលដ្ឋាននៅទីក្រុងសេអ៊ូល បាន​រាយការណ៍ថា ​យោធាកូរ៉េខាងត្បូង មិនបានបង្ហាញព័ត៌មានលម្អិត អំពី​ការសាកល្បង នៅថ្ងៃបាញ់សាកល្បងនោះទេ ដែលធ្វើ​ឲ្យមាន​ការ​ចោទសួរអំពីថា តើខ្លួនបានលាក់បាំងព័ត៌មាន ឬបរាជ័យក្នុងការរកឃើញការបាញ់មីស៊ីលទាន់ពេលវេលាដែរ ឬទេ។

ប្រព័ន្ធផ្សព្វផ្សាយក្នុងស្រុក បានលើក​ឡើង​ថា ការសម្រេចចិត្តរបស់សហរដ្ឋអាមេរិក ក្នុងការកំណត់ការចែករំលែកព័ត៌មានជាមួយកូរ៉េខាងត្បូង ជុំវិញសកម្មភាព​យោធារបស់កូរ៉េខាងជើង អាចបានរារាំងសមត្ថភាពរបស់ទីក្រុងសេអ៊ូល ក្នុងការតាមដានពួកគេ ក្នុងពេលវេលាជាក់ស្តែង។

លោកវរសេនីយ៍ឯក Lee Kyung-ho អ្នកនាំពាក្យរងក្រសួងការពារជាតិ បាននិយាយថា៖ «កូរ៉េខាងត្បូង និងសហរដ្ឋអាមេរិក បានរកឃើញ និងតាមដានមីស៊ីល​ជាច្រើនគ្រាប់ ក្នុងពេលវេលាជាក់ស្តែង ដែលបាញ់ដោយកូរ៉េខាងជើង កាលពីថ្ងៃទី២៥ ខែមិថុនា ដោយបន្ត​ការសម្របសម្រួលយ៉ាងជិតស្និទ្ធ សម្រាប់គ្រប់កាលៈទេសៈទាំងអស់»។ លោក Lee បានបញ្ជាក់​ថា គ្រាប់មីស៊ីលទាំងនេះ ត្រូវបានចាត់ថ្នាក់ជា «ប្រព័ន្ធអាវុធយុទ្ធសាស្ត្រ» ហើយលក្ខណៈបច្ចេកទេសលម្អិត នឹងត្រូវបានបញ្ចប់ បន្ទាប់ពីមាន​ការវិភាគដ៏ទូលំទូលាយ។ លោកបានសង្កត់ធ្ងន់ថា ការលះបង់របស់សមាជិកទីភ្នាក់​ងារ​កូរ៉េខាងត្បូង និងសហរដ្ឋអាមេរិក មិនគួរត្រូវបានបំផ្លាញតាមរយៈ «ការបកស្រាយពាក់​ព័ន្ធ​នឹង​នយោបាយ» ឡើយ៕