ប្រទេសចិនបានបន្ថែមអង្គការរបស់​ជប៉ុនចំនួន ២០ ក្នុង​នោះ​មាន​រួមទាំងក្រុមហ៊ុនធំៗផង​ដែរ​ ទៅក្នុងបញ្ជីខ្មៅ នៅថ្ងៃចន្ទ (ទី២៩ ខែមិថុនា ឆ្នាំ២០២៦) ជុំវិញការនាំចេញរបស់របរដែលអាចប្រើប្រាស់ សម្រាប់គោលបំណងយោធា និងស៊ីវិល ដែលធ្វើ​ឱ្យជម្លោះរយៈពេលជាច្រើនខែកាន់តែ​កើន​ឡើង​​ រវាងទីក្រុងប៉េកាំង និងតូក្យូ។

ក្រសួងបានឲ្យ​ដឹង​នៅក្នុងសេចក្តីថ្លែងការណ៍មួយថា អង្គភាព​បន្ថែមថ្មីទាំងនេះ «បានចូលរួមក្នុងការអភិវឌ្ឍសមត្ថភាពយោធារបស់ជប៉ុន»។ ក្រសួងបានបន្ថែមថា ការរឹតបន្តឹងការនាំចេញ កំពុងត្រូវបានអនុវត្ត «សម្រាប់គោលបំណងការពារសន្តិសុខជាតិ និងផលប្រយោជន៍ និងបំពេញកាតព្វកិច្ចអន្តរជាតិ ​រួមទាំងការមិនរីកសាយភាយអាវុធនុយក្លេអ៊ែរផង​ដែរ​»។

គួរ​បញ្ជាក់​ថា ទំនាក់ទំនង រវាងប្រទេសទាំង២ ត្រូវបានរង្គោះរង្គើ កាលពីខែវិច្ឆិកាឆ្នាំ​មុន​ នៅពេលដែលនាយករដ្ឋមន្ត្រីជប៉ុន លោកស្រី​ Sanae Takaichi បានលើក​ឡើង​ថា ទីក្រុងតូក្យូអាចនឹងឆ្លើយតបដោយយោធា ចំពោះការវាយប្រហារ លើតៃវ៉ាន់ ជាកោះស្វ័យ​គ្រប់គ្រង​ដែលទីក្រុងប៉េកាំងបានសន្យាថា នឹងក្រសោប​ដោយកម្លាំង ប្រសិនបើចាំបាច់។

ការបន្ថែមអង្គភាព​ចំនួន​ ២០ ទៅក្នុងបញ្ជីខ្មៅនាំចេញ ដែលត្រូវ​បានដាក់ឈ្មោះនៅថ្ងៃទី ២៩ ខែមិថុនា រួមមានក្រុមហ៊ុនបុត្រសម្ព័ន្ធឯកទេស និងក្រុមហ៊ុនបច្ចេកវិទ្យាជាច្រើនដែលពាក់ព័ន្ធនឹងការផ្គត់ផ្គង់គ្រឿងបន្លាស់ និងការគាំទ្រផ្នែកវិស្វកម្ម សម្រាប់វិស័យការពារជាតិរបស់ជប៉ុន៕