កាលពីថ្ងៃអាទិត្យ អ៊ូហ្គង់ដាបានប្រកាសពីផែនការជម្លៀសពលរដ្ឋរបស់ខ្លួនចំនួន ៧៤៦ នាក់ ចេញពីអាហ្វ្រិកខាងត្បូង បន្ទាប់ពីអំពើហិង្សាប្រឆាំងជនបរទេសកើនឡើងជាច្រើនខែ ដោយប្រតិបត្តិការនេះ ត្រូវបានគេរំពឹងថា នឹងចាប់ផ្តើមក្នុងរយៈពេលប៉ុន្មានថ្ងៃខាងមុខនេះ។

លោក Haruna Kasolo រដ្ឋមន្ត្រីការបរទេសស្តីទីរបស់ប្រទេសអ៊ូហ្គង់ដា បានប្រាប់អ្នកយកព័ត៌មានថា ជនភៀសខ្លួនបានចុះឈ្មោះវិលត្រឡប់មកប្រទេសវិញហើយ ហើយក្រសួងកំពុងធ្វើការជាមួយភ្នាក់ងាររដ្ឋាភិបាលពាក់ព័ន្ធ សហគមន៍អ៊ូហ្គង់ដានៅអាហ្វ្រិកខាងត្បូង និងឧត្តមស្នងការអ៊ូហ្គង់ដា នៅទីក្រុង Pretoria ដើម្បីបញ្ចប់ផែនការជម្លៀសនេះ។

លោក Kasolo បាននិយាយថា រដ្ឋាភិបាលនឹងសម្រួលដល់ការចុះឈ្មោះជនភៀសខ្លួន បញ្ជូនពួកគេទៅកាន់មជ្ឈមណ្ឌលជួបជុំដែលមានសុវត្ថិភាព ការចេញឯកសារធ្វើដំណើរបន្ទាន់ នៅពេលចាំបាច់ និងការចាកចេញរបស់ពួកគេពីអាហ្វ្រិកខាងត្បូង។

លោកបាននិយាយថា ក្រុមហ៊ុនអាកាសចរណ៍អ៊ូហ្គង់ដា ដែលជាក្រុមហ៊ុនអាកាសចរណ៍ជាតិរបស់ប្រទេសនេះ នឹងដំណើរការជើងហោះហើរពិសេសសម្រាប់ការជម្លៀស ដោយចំណាយផ្សេងៗ នឹងត្រូវរ៉ាប់រងដោយរដ្ឋាភិបាលអ៊ូហ្គង់ដា៕