ប្រធានាធិបតីអ៊ីរ៉ង់ នៅ​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ បាន​ប្រាប់​ឱ្យដឹង​ថា ទ្រព្យសម្បត្តិបង្កកចំនួន ៦ពាន់លានដុល្លាររបស់ប្រទេសអ៊ីរ៉ង់ នឹងត្រូវបានបញ្ចេញ​ដោយកាតា ខណៈដែលការចរចាជាមួយសហរដ្ឋអាមេរិក បាន​ប្រឈម​នឹង​បញ្ហា ដោយសារការវាយប្រហារនៅទូទាំងឈូងសមុទ្រពែក្ស​ កាល​ពី​ចុងសប្តាហ៍កន្លង​មក​។

ការលើកឡើងរបស់លោក Masoud Pezeshkian អំពីមូលនិធិនេះ ហាក់ដូចជាមានគោលបំណងប្រកាស​ដល់​សាធារណជនអ៊ីរ៉ង់ ជុំវិញ​កិច្ចព្រមព្រៀងបណ្តោះអាសន្ន ជាពិសេសនៅពេលដែលការគ្រប់​គ្រង​កាន់​តែ​តឹង​រ៉ឹង​របស់ខ្លួន នៅច្រកសមុទ្រ Hormuz ត្រូវបានជួប​ប្រទះនឹង​បញ្ហា ដោយសារកិច្ចប្រឹងប្រែង ដើម្បីបើកដែនទឹករបស់ប្រទេសអូម៉ង់​ឲ្យ​មាន​ចរាចរណ៍ចេញ​ពី​ និង​ចូលឈូងសមុទ្រពែក្ស។

ការវាយប្រហារ និងការគំរាមកំហែងរបស់អ៊ីរ៉ង់ បានបញ្ឈប់នាវាដឹកទំនិញ និងនាវាដឹកប្រេងមិន​ឲ្យ​ឆ្លងកាត់ច្រកសមុទ្រនេះ​ ដែលការ​ជួញដូរទាំងអស់នៃ​ប្រេង និងឧស្ម័នធម្មជាតិប្រហែល ១ភាគ៥ បានឆ្លងកាត់ក្នុងពេលសន្តិភាព ដោយ​ការ​ឈប់​នោះ​បង្កើតបាន​ជា​វិបត្តិថាមពលសកល។

ប៉ាគីស្ថាន ដែលជាអន្តរការី​ដ៏សំខាន់មួយ បានឱ្យដឹង​ថា កិច្ចចរចានឹងចាប់ផ្ដើម​ឡើងវិញ នៅថ្ងៃអង្គារ រវាងសហរដ្ឋអាមេរិក និងអ៊ីរ៉ង់ ពាក់ព័ន្ធ​នឹង​​លក្ខខណ្ឌនៃកិច្ចព្រមព្រៀងបណ្តោះអាសន្នរបស់ភាគីទាំង​២​។ រដ្ឋបាលលោកប្រធានាធិបតី​ Donald Trump កាលពីថ្ងៃអាទិត្យ បានឲ្យ​ដឹង​ថា គ្មានអ្វីត្រូវបានលុបចោលទេ ហើយកិច្ចចរចាបច្ចេកទេសកំពុងដំណើរការសម្រាប់ថ្ងៃខាងមុខ។ អ៊ីរ៉ង់មិនទាន់បានប្រាប់​នៅឡើយទេថា តើខ្លួននឹងចូលរួមដែរ ឬអត់។

ពាក់ព័ន្ធ​ទ្រ​ព្យ​សម្បត្តិ​បង្កក​ ដោយ​មិន​បាន​ពន្យល់​ឱ្យ​បាន​លម្អិត​ ប្រធានាធិបតី​អ៊ីរ៉ង់ លោក Pezeshkian បានបញ្ជាក់​ថា៖ «ដោយផ្អែកលើផែនការដែលបានធ្វើឡើង ទឹកប្រាក់ចំនួន ៦ពាន់លានដុល្លារ ក្នុងចំណោមធនធានសរុប ១២ពាន់លានដុល្លាររបស់អ៊ីរ៉ង់ នៅក្នុងប្រទេសកាតា នឹងត្រូវបានបញ្ចេញ និងប្រគល់ជូនប្រទេសវិញ ហើយដំណើរការចាំបាច់នានា​ កំពុងត្រូវបានអនុវត្ត»៕