មនុស្សម្នាក់ស្លាប់​​ និងម្នាក់ទៀតរងរបួសធ្ងន់គំរាម​គំហែង​ដល់​ជីវិត ក្នុងហេតុការណ៍​បាញ់ប្រហារមួយ នៅជិតទីលាន San Pedro ដែលជាសង្កាត់កម្សាន្តដ៏ពេញនិយម និងជាកន្លែងជួបជុំរបស់​អ្នកគាំទ្រព្រឹត្តិការណ៍ World Cup ក្នុងទីក្រុង San Jose រដ្ឋ California កាលពីថ្ងៃអាទិត្យ (ទី២៨ ខែមិថុនា ឆ្នាំ២០២៦)។

អង្គភាពនគរបាល San Jose (SJPD) បានឲ្យ​ដឹង​ថា ការបាញ់ប្រហារនេះ បានកើតឡើងនៅម៉ោងប្រហែល ៩:១២នាទីយប់ ម៉ោងក្នុងស្រុក (ត្រូវ​នឹង ៤:១២នាទី ម៉ោង​សកល​) នៅចំណុចប្រសព្វនៃផ្លូវ North Market និង West Santa Clara។

នគរបាល​បានបញ្ជាក់​ថា ជនរងគ្រោះម្នាក់ត្រូវបានប្រកាសថា ស្លាប់នៅកន្លែងកើតហេតុ ខណៈដែលជនរងគ្រោះទី២ ត្រូវបានបញ្ជូនទៅមន្ទីរពេទ្យមូល​ដ្ឋាន​ ដោយមានរបួសគំរាម​កំហែង​ដល់​អាយុជីវិត។ SJPD បានបន្ថែម​ថា ហេតុការណ៍នេះកំពុងត្រូវបានស៊ើបអង្កេតថា ជាករណីឃាតកម្ម។

ការបាញ់ប្រហារនេះបានកើតឡើង បន្ទាប់ពីសកម្មភាពព្រឹត្តិការណ៍ World Cup នៅថ្ងៃនោះ បានបញ្ចប់ ទោះបីជាសង្កាត់កម្សាន្តនេះ​នៅតែមមាញឹក ដោយសារមាន​​អ្នកទស្សនា និងអ្នកស្រុកយ៉ាង​កុះករក៏ដោយ។ នេះបើយោងតាមរបាយការណ៍ក្នុងស្រុក។

អាជ្ញាធរបានឆ្លើយតបយ៉ាងរហ័ស នៅ​កន្លែងកើតហេតុ និងបានបិទផ្លូវជុំវិញជាច្រើន ដោយជំរុញឱ្យសាធារណជនជៀសវាងតំបន់នោះ។ គេ​នៅតែមិនទាន់ច្បាស់ថា ការបិទផ្លូវនឹងមានរយៈពេលយូរប៉ុនណា​។ អត្តសញ្ញាណរបស់ជនរងគ្រោះមិនទាន់ត្រូវបានចេញផ្សាយនៅឡើយទេ ហើយមិនមានព័ត៌មាន អំពីជនសង្ស័យ ឬហេតុផលណាមួយដែលអាចរកបានភ្លាមៗឡើយ​៕