ក្រសួងការបរទេសអ៊ីរ៉ង់ បានប្រាប់​ឲ្យដឹង​នៅ​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ​ថា ខ្លួនបានរៀបចំកិច្ចប្រជុំលើកដំបូងជាមួយអូម៉ង់ ស្តីពីការគ្រប់គ្រងច្រកសមុទ្រ Hormuz ចាប់តាំងពីទីក្រុងតេអេរ៉ង់ និងវ៉ាស៊ីនតោន បានចុះហត្ថលេខាលើកិច្ចព្រមព្រៀងបឋម ដើម្បីបញ្ចប់សង្គ្រាមមជ្ឈិមបូព៌ា។

ទាំងអ៊ីរ៉ង់ និងអូម៉ង់ ឲ្យ​ដឹង​ថា ពួកគេកាន់កាប់អធិបតេយ្យភាព លើផ្លូវទឹកនេះ​ ដែលជាផ្លូវដ៏​សំខាន់ សម្រាប់ការនាំចេញថាមពលឈូងសមុទ្រដែលទីក្រុងតេអេរ៉ង់បានរារាំងក្នុងអំឡុងសង្គ្រាម។

នៅលើបណ្ដាញសង្គម X ដោយមិនបានបញ្ជាក់កាលបរិច្ឆេទ លោក Kazem Gharibabadi អនុរដ្ឋមន្ត្រីការបរទេសអ៊ីរ៉ង់ បានលើក​ឡើងថា៖ «ក្នុងអំឡុងពេលធ្វើដំណើរទៅកាន់ទីក្រុង Muscat កិច្ចប្រជុំលើកដំបូងនៃគណៈកម្មាធិការចម្រុះ Hormuz ត្រូវបានធ្វើឡើង»។ លោកបានបន្ថែមថា៖ «ខណៈពេលដែលកំពុងពិនិត្យមើលបញ្ហាបច្ចុប្បន្ន ទាក់ទងនឹងច្រកសមុទ្រនេះ​ យើងបានផ្លាស់ប្តូរទស្សនៈលើការគ្រប់គ្រងនាពេលអនាគត»។

ចក្រ​សមុទ្រ Hormuz គឺជាផ្លូវទឹកតូចចង្អៀតខណ្ឌចែក​អ៊ីរ៉ង់ និងអូម៉ង់ដែលមានទទឹងត្រឹមតែប្រហែល ៣០​គីឡូម៉ែត្រប៉ុណ្ណោះ។ អនាគតនៃច្រកសមុទ្រនេះ គឺជាចំណុចជាប់គាំងដ៏ធំ​ ក្នុងដំណើរការ​ចរចា រវាងទីក្រុងតេអេរ៉ង់ និងវ៉ាស៊ីនតោន ដើម្បីបញ្ចប់ជម្លោះរបស់ភាគីទាំង​២៕