អ្នកនាំពាក្យរដ្ឋាភិបាលមួយ​រូប បាននិយាយនៅ​ថ្ងៃចន្ទ (ទី២៩ ខែមិថុនា ឆ្នាំ២០២៦) នេះ​ថា រដ្ឋាភិបាលអ៊ីរ៉ាក់ បានកំណត់យក​ថ្ងៃទី២១ ខែកញ្ញា ជាពេល​វេលា​ផុតកំណត់ចុងក្រោយ ដើម្បី​ឲ្យ​ក្រុមប្រដាប់អាវុធប្រគល់អាវុធរបស់ពួកគេទៅអាជ្ញាធររដ្ឋ។

នៅក្នុងសេចក្តីថ្លែងការណ៍ដែលចុះផ្សាយដោយទីភ្នាក់ងារសារព័ត៌មានរដ្ឋ INA លោក Haider al-Aboudi បានបញ្ជាក់​ថា៖ «ថ្ងៃទី២១ ខែកញ្ញា គឺជាពេល​វេលា​ផុតកំណត់ចុងក្រោយ សម្រាប់ការប្រគល់អាវុធ ហើយក្នុងពេលជាមួយគ្នានេះ សម្រាប់ការដកខ្លួនផ្ដាច់​ពីសម្ព័ន្ធមិត្តអន្តរជាតិ»។

 ជាមួយ​គ្នានេះ បញ្ហា​​ដាច់​ដោយឡែកមួយទៀត​ លោក Aboudi បាននិយាយថា រដ្ឋាភិបាលអ៊ីរ៉ាក់ បានយល់ព្រមតាម​សំណើរបស់អ៊ីរ៉ង់ ក្នុងការរៀបចំពិធីបុណ្យសព សម្រាប់អតីតមេដឹកនាំកំពូលអ៊ីរ៉ង់ លោក Ali Khamenei នៅក្នុងប្រទេសអ៊ីរ៉ាក់ នា​ថ្ងៃទី៨ ខែកក្កដា។

កាល​ពី​ថ្ងៃអាទិត្យ រដ្ឋមន្ត្រីការបរទេសអ៊ីរ៉ង់ លោក Abbas Araghchi បានឲ្យ​ដឹង​ថា ទីក្រុងតេអេរ៉ង់នឹងសម្របសម្រួលជាមួយអ៊ីរ៉ាក់ ជុំវិញ​ការរៀបចំ សម្រាប់ពិធីដង្ហែសពរបស់លោក Khamenei នៅឯទីសក្ការៈបូជាដ៏ពិសិដ្ឋរបស់ប្រទេសអ៊ីរ៉ាក់៕