សហរដ្ឋអាមេរិក បានឱ្យដឹង​ថា កិច្ចប្រជុំកម្រិតខ្ពស់ ស្តីពីអ៊ីរ៉ង់ នឹងត្រូវធ្វើឡើងនៅទីក្រុងដូហា ប្រទេស​កាតា នៅថ្ងៃអង្គារ (ទី៣០ ខែមិថុនា ឆ្នាំ២០២៦) ដោយបេសកជនជាន់ខ្ពស់​របស់លោក​ប្រធានាធិបតី Donald Trump គឺលោក Steve Witkoff និងលោក Jared Kushner នឹងធ្វើ​ដំណើរ​ទៅ​ចូលរួម ខណៈពេលដែលកិច្ចពិភាក្សាបច្ចេកទេស ក៏នឹងចាប់​ផ្ដើម​នៅក្រៅកិច្ច​ប្រជុំ​នោះផងដែរ។

តាម​រយៈ​ការបង្ហោះ នៅលើបណ្ដាញ​សង្គម នៅ​ថ្ងៃចន្ទនេះ​ លោក Trump បានបញ្ជាក់​ថា អ៊ីរ៉ង់បានស្នើសុំឲ្យ​មាន​កិច្ចប្រជុំមួយ ហើយវានឹងធ្វើឡើងនៅរដ្ឋធានីរបស់​កាតា តែ​មិនផ្តល់ព័ត៌មានលម្អិតណាមួយឡើយ។ ក្រោយមក អ្នក​នាំ​ពាក្យ​របស់លោក Trump គឺលោកស្រី Karoline Leavitt បានប្រាប់ប្រព័ន្ធ​ផ្សព្វផ្សាយ​ Fox News ថា លោក Witkoff និងលោក Kushner នឹងចូលរួមកិច្ចពិភាក្សានេះ។

លោកស្រីបាននិយាយ​ថា៖ «បេសកជនពិសេស លោក Witkoff និងលោក Jared Kushner នឹងធ្វើ​ដំណើរ​ទៅកាន់ទីក្រុងដូហា សម្រាប់កិច្ចប្រជុំកម្រិតខ្ពស់ នៅសប្តាហ៍នេះ ខណៈពេលដែលយើងបន្តពិភាក្សា អំពីអនុស្សរណៈនៃការយោគយល់គ្នា (MOU)។ នៅក្រៅកិច្ចពិភាក្សាកម្រិតខ្ពស់ទាំងនោះ នឹងមានកិច្ចពិភាក្សាបច្ចេកទេស»។

កាលពី​ថ្ងៃទី១៧ ខែមិថុនា សហរដ្ឋអាមេរិក និងអ៊ីរ៉ង់ បានចុះហត្ថលេខាលើ MOU ចំនួន ១៤ចំណុច ដែលមានគោលបំណងបញ្ចប់ជម្លោះរយៈពេល ៤ខែ ដែលក្រោមអនុស្សរណៈនេះ ភាគីទាំង២ បានព្រមព្រៀងគ្នាបញ្ឈប់អរិភាព និងបើកច្រកសមុទ្រ Hormuz ឡើងវិញ។ ប្រេង និងឧស្ម័នធម្មជាតិរាវ ១ភាគ៥ របស់ពិភពលោក ជាធម្មតាឆ្លងកាត់ច្រក​សមុទ្រ​នេះ។

ប៉ុន្តែការវាយប្រហារសងសឹកគ្នា កាល​ពី​ចុងសប្តាហ៍ បានគំរាមកំហែងធ្វើ​ឱ្យមាន​ការ​​រអាក់រអួលដល់​កិច្ចព្រមព្រៀងដ៏ផុយស្រួយនេះ។ ការវិលត្រឡប់ទៅរកការចរចាវិញ នឹងកើតឡើងបន្ទាប់ពីមាន​ការវាយប្រហារ និងការវាយប្រហារតបតវិញជាច្រើនថ្ងៃ ចាប់តាំងពីមីស៊ីល​របស់អ៊ីរ៉ង់បានវាយប្រហារនាវាដឹកទំនិញ ១គ្រឿង នៅច្រកសមុទ្រកាលពីថ្ងៃព្រហស្បតិ៍សប្ដាហ៍មុន​ ដោយទាំងសហរដ្ឋអាមេរិក និងអ៊ីរ៉ង់ បានចោទប្រកាន់គ្នាទៅវិញទៅមកថា បានបំពានបទឈប់បាញ់បណ្តោះអាសន្ននេះ​៕