នៅថ្ងៃចន្ទនេះ តំបន់បាល់កង់មានអារម្មណ៍ថា រងឥទ្ធិពលពីរលកកម្តៅបំបែកកំណត់ត្រាដែលបណ្តាលឲ្យមនុស្សរាប់រយនាក់ស្លាប់ និងធ្វើឲ្យអាក់ខានដល់ការរស់នៅប្រចាំថ្ងៃនៅទូទាំងទ្វីបអឺរ៉ុបអស់រយៈពេលជាង ១សប្តាហ៍មកហើយ ក្នុងនោះក្តីកង្វល់កើនឡើងចំពោះការរីករាលដាលភ្លើងឆេះព្រៃ ។

មាននូវការព្រមានផងដែរថា រលកកម្តៅទំនងបន្តកើតមាននៅសប្តាហ៍នេះ នៅតាមបណ្តាប្រទេសជាច្រើនដូចជាបារាំង និងអាល្លឺម៉ង់ ។

ទីក្រុងប៉ារីស បានឡើងដល់កំណត់ត្រាខែមិថុនា៤០,៩អង្សាសេ កាលពីសប្តាហ៍មុន ហើយទោះបីជាសីតុណ្ហភាពត្រូវបានគេរំពឹងថានឹងថយចុះក៏ដោយ អាជ្ញាធរបានត្រៀមទប់ទល់សម្រាប់ការស្លាប់និងរងរបួសបន្ថែមទៀត។ រដ្ឋមន្ត្រីសុខាភិបាលបារាំង បានប្រាប់អ្នកសារព័ត៌មានថា នឹងមានផលវិបាកទាក់ទងនឹងចំនួនអ្នកស្លាប់កើនឡើង

នៅប្រទេសក្រូអាត សេវាកម្មអាកាសធាតុ បានចេញការប្រកាសអាសន្នកម្រិតពណ៌ក្រហមនាថ្ងៃចន្ទនេះ សម្រាប់តំបន់ជាច្រើន រួមទាំងនៅរដ្ឋធានី Zagreb និងទីក្រុងគោលដៅទេសចរណ៍ Split និង Dubrovnik ។

ក្រុមភ្នាក់ងារពន្លត់អគ្គិភ័យ ដោយមានជំនួយពីយន្តហោះ ៤គ្រឿង បានព្យាយាមពន្លត់ភ្លើងឆេះព្រៃនៅកោះ Vis ស្ថិតក្នុងសមុទ្រ Adriatic ដែលមានចម្ងាយប្រហែល ៥៥គ.ម ភាគនិរតីទីក្រុង Split ។

ក្រុមអ្នកវិទ្យាសាស្ត្របាននិយាយថា រលកកម្ដៅដែលបានចាប់ផ្តើមនៅថ្ងៃទី២០ ខែមិថុនាកន្លងទៅ គឺជារលកកម្ដៅដ៏អាក្រក់បំផុតមិនធ្លាប់កើតឡើងនៅអឺរ៉ុប ដែលជាអាកាសធាតុកំពុងប្រែប្រួលលឿនជាងកម្រិតមធ្យមសកល ៕