ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញឲ្យគ្រប់ភាគីទាំងអស់ ត្រូវខិតខំតស៊ូប្ដូរផ្ដាច់ ធ្វើយ៉ាងណាឲ្យដំណើរការ នៃការបោះឆ្នោតជ្រើសរើសក្រុមប្រឹក្សាឃុំសង្កាត់ នាពេលខាងមុខនេះ ប្រព្រឹត្តិទៅដោយរលូន គ្មានការគំរាមកំហែង និងតម្លាភាពជាដើម ។

ក្នុងកិច្ចប្រជុំផ្សព្វផ្សាយផែនការអន្តរស្ថាប័នស្តីពី កិច្ចការពារការពិនិត្យបញ្ជីឈ្មោះការបោះឆ្នោត​ប្រចាំឆ្នាំ និងការបោះឆ្នោតថ្នាក់ជាតិ ថ្នាក់ក្រោមជាតិ ចាប់ពីឆ្នាំ២០២២-២០២៤ នៅថ្ងៃទី២៩ ខែមេសា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថា សភាពការទូទៅគឺមានលក្ខណៈល្អប្រសើរ ហើយមូលដ្ឋានគ្រឹះសម្រាប់​ធានា​សន្តិសុខ ត្រូវបានរៀបចំដោយភាពម្ចាស់ការ​ និងមានស្មារតីទទួលខុសត្រូវ ​ពីគ្រប់ក្រសួងស្ថាប័ន និងអាជ្ញាធរមានសមត្ថកិច្ចពាក់ព័ន្ធ ។

សម្ដេច បានបន្តថា ប៉ុន្តែកិច្ចដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ នាពេលខាង​មុខនេះ ​គឺជាដំណាក់កាលតស៊ូ ​ប្រកបដោយ​ការ​ប្រកួតប្រជែង​យ៉ាង​តឹងតែង និងក្ដៅគគុក​របស់​គណបក្ស​នយោបាយ​ដែលបានចូលរួម ​ហើយក៏ជាដំណាក់កាល​ ដែលងាយនឹងកើតឡើង នូវ​ទំនាស់ ឬ​បទល្មើសផ្សេងៗ ​អាចបង្ក​ជា​ឧបសគ្គ​រារាំង ឬបន្ទុចបង្អាក់ដល់កិច្ចដំណើរ​ការ​បោះឆ្នោត​ទៀតផង ។

សម្ដេចក្រឡាហោម សង្កត់ធ្ងន់ថា ​ដើម្បីទប់ស្កាត់នូវសកម្មភាពបន្ទុចបង្អាកការបោះឆ្នោត សូម​ប្រគល់​តួនាទីដល់គណៈឞញ្ជាការឯកភាព​ រដ្ឋបាលរាជធានីខេត្ត ​ទទួលខុសត្រូវដឹកនាំដោយផ្ទាល់ ក្នុងកិច្ចការធានាសន្តិសុខសណ្ដាប់ធ្នាប់សាធារណៈ ​និងសុវត្ថិភាព​សង្គមក្នុងភូមិសាស្ត្ររបស់ខ្លួន និងធានា​ឲ្យបានដាច់ខាតនូវស្ថិរភាពសន្តិសុខ​សម្រាប់ការបោះឆ្នោត ពិសេសធានាឲ្យ​កិច្ច​ដំណើរ​ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះ​ ប្រព្រឹត្តិទៅដោយរលូន ប្រកប​ដោយ​ភាពស្ងប់ស្ងាត់ ​គ្មានការ​គំរាមកំហែង ​គ្មានអំពើហិង្សា ​និងប្រកបដោយតម្លាភាព ។

រដ្ឋមន្ត្រីក្រសួងមហាផ្ទៃ បានបន្ថែមថា​ ទន្ទឹមនេះ​ ត្រូវយកចិត្តទុកដាក់ខ្ពស់លើការងារមួយ ចំនួន មាន​ត្រូវពង្រឹងយន្តការព័ត៌មាន, គ្រប់ផែនការទំនាស់ផ្សេងៗកើតឡើង​ក្នុងមូលដ្ឋាន ត្រូវខិតខំ​ដោះស្រាយពីដើមទី មិនត្រូវទុកក្លាយជា​ទំនាស់​រ៉ាំរ៉ៃ​ អាច​បង្កឲ្យមានចលាចលសង្គម និងក្លាយ​ជា​ឧបករណ៍នៃការកេងចំណេញផ្នែកនយោបាយ​ ត្រូវ​លើក​កម្ពស់តួនាទីដឹកនាំ ដោយត្រូវចាត់​វិធាន​ការ​តាមគ្រប់មធ្យោបាយ ​គ្រប់រូបភាព ​និងស្របតាមច្បាប់ ដើម្បីបង្ការហេតុការគ្រោះថ្នាក់នានា ក៏ដូចជា​បង្ការទប់ស្កាត់ ​និងបង្ក្រាបរាល់បទល្មើសគ្រប់ប្រភេទ​ ក្នុងភូមិសាស្ត្ររបស់ខ្លួន ។

សម្ដេចក្រឡាហោម ស ខេង បានបញ្ជាក់ថា ​រាល់​ហេតុការណ៍គ្រោះថ្នាក់ ឬបទល្មើស​ដែល​បានកើតឡើង ​ត្រូវខិតខំដោះស្រាយ​ តាមស្វែងរកជនដែលបង្ក ​និងស្រាវជ្រាវតាមចាប់ខ្លួនជនល្មើស យកមកផ្ដន្ទាទោស​តាមផ្លូវច្បាប់ជាធរមាន ដើម្បី​ជៀសវាង​ការឆ្លៀតឱកាសយកហេតុការណ៍​គ្រោះថ្នាក់ ​និងបទល្មើសនានានោះ​ ទៅបំភ្លៃរឿងនយោបាយ ៕ អត្ថបទ បាន សុខរិទ្ធិ