ភ្នំពេញ៖ អន្តរស្ថាប័ន មានក្រសួងមហាផ្ទៃ ក្រសួងការពារជាតិ និងគណៈកម្មាធិការជាតិរៀបចំការបោះឆ្នោត (គ.ជ.ប) បានជំរុញទៅកងកម្លាំង ត្រូវពង្រឹងការការពារ នូវគោលដៅអទិភាពមួយចំនួន ពាក់ព័ន្ធលើការងារបោះឆ្នោត ខណៈការបោះឆ្នោតក្រុមប្រឹក្សាឃុំសង្កាត់ឆ្នាំ២០២២កាន់តែខិតជិតមកដល់ ។

ក្នុងកិច្ចប្រជុំផ្សព្វផ្សាយផែនការអន្តរស្ថាប័នស្តីពី កិច្ចការពារ ការពិនិត្យបញ្ជីឈ្មោះការបោះឆ្នោត​ប្រចាំឆ្នាំ និងការបោះឆ្នោតថ្នាក់ជាតិ ​ថ្នាក់ក្រោមជាតិ​ ចាប់ពីឆ្នាំ២០២២-២០២៤ នៅថ្ងៃទី២៩ ខែមេសា ឆ្នាំ២០២២ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ មានប្រសាសន៍ថា ផែនការអន្តរស្ថាប័ន មានយន្តការ និងរចនាសម្ព័ន្ធសន្តិសុខបោះឆ្នោត ត្រូវចាត់ចែងភ្នាក់ងារសន្តិសុខបោះឆ្នោត ឲ្យការពារមុខសញ្ញា និងគោលដៅសំខាន់ៗ តាមសំណូមពរ​ចាំបាច់របស់ គ.ជ.ប ឬ និងគណៈកម្មការរៀបចំការបោះឆ្នោតគ្រប់ដាប់ថ្នាក់ ។ ចំពោះមុខសញ្ញា ឬគោលដៅខ្លះ គួរត្រូវបានរៀបចំការពារជារួម ឬប្រយោល ពីព្រោះមិនមាន​លទ្ធផល​ប្រើ​ប្រាស់កម្លាំង ​ដើម្បី​ការពារផ្ទាល់ ចំពោះគ្រប់មុខសញ្ញា​ ឬនៅគោលដៅនីមួយៗបានទេ ។

ឯកឧត្តម បានបន្តថា ​សម្រាប់មុខសញ្ញាការពារជាអទិភាព មានសមាជិក គ.ជ.ប និងមន្ត្រីបោះឆ្នោត​គ្រប់​លំដាប់ថ្នាក់, ក្រុមចុះឈ្មោះបោះឆ្នោត ​និងក្រុមប្រឹក្សាឃុំសង្កាត់ ប្រជាពលរដ្ឋទៅពិនិត្យបញ្ជី​ឈ្មោះ ​និងចុះឈ្មោះបោះឆ្នោត អ្នកបោះឆ្នោត ​និងអង្គបោះឆ្នោត គណបក្សនយោបាយ​ឈរឈ្មោះ​បោះឆ្នោត បេក្ខជន និងអ្នកគាំទ្រ ​ពលរដ្ឋមានសិទ្ធិបោះឆ្នោត, អ្នកសង្កេតការណ៍បោះឆ្នោត តំណាង​របស់អង្គការមិនមែនរដ្ឋាភិបាល​ ឬប្រទេសនានា ។

នាយឧត្តមសេនយ៍សន្តិបណ្ឌិត នេត សាវឿន បានបន្ថែមថា ចំពោះគោលដៅការពារអទិភាព មាន​ទីស្ដីការ គ.ជ.ប និងស្នាក់ការ លធ.ខប គធ.ខប និង គឃ.សប, ការិយាល័យពិនិត្យបញ្ជីឈ្មោះ និងចុះឈ្មោះបោះឆ្នោត ការិយាល័យបោះឆ្នោត ​និងរាប់សន្លឹកឆ្នោត ​ទីតាំងបិទផ្សាយបញ្ជីបោះឆ្នោត បញ្ជីទីតាំងការិយាល័យបោះឆ្នោត ​បញ្ជីបេក្ខជនឈរឈ្មោះបោះឆ្នោត ទីតាំងរោងពុម្ពផលិត​សន្លឹកឆ្នោត ​កន្លែងរក្សាទុក ឬការ​ដឹក​ជញ្ជូន​សម្ភារៈ បរិក្ខារ ​និង​សង្ហារឹមបម្រើការងារបោះឆ្នោត ឯកសារបោះឆ្នោត ​សន្លឹកឆ្នោត ​និងកំណត់ហេតុបូកសរុបលទ្ធផលបោះឆ្នោត ពីគោលដៅ​មួយ​ទៅគោលដៅមួយ ​ដែលកំណត់ដោយ គ.ជ.ប ឬគណៈកម្មការរៀបចំការបោះឆ្នោតគ្រប់លំដាប់ថ្នាក់ ទីស្នាក់ការ និងកន្លែងជួបប្រជុំ ឬការឃោសនារបស់គណបក្សនយោបាយ ឬបេក្ខជន ។

អគ្គស្នងការនគរបាលជាតិ បានបន្តទៀថា ជាមួយគ្នានេះ អន្តរស្ថាប័ន ​បានសំណូមពរ ក្រសួង ស្ថាប័ន្ធពាកព័ន្ធ ​និងអាជ្ញាធរគ្រប់លំដាប់ថ្នាក់ ​ដែលទទួលខុសត្រូវលើការងារសន្តិសុខ សណ្ដាប់ធ្នាក់​សាធារណៈ និងវិស័យផ្សេងៗទៀត​ ពិសេសយន្តការ ​និងរចនាសម្ព័ន្ធសន្តិសុខ ​បោះឆ្នោតគ្រប់ថ្នាក់ ត្រូវផ្ដល់កិច្ចសហការជាដាច់ខាតដល់ គ.ជ.ប និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ដើម្បី​រក្សាសន្តិសុខ ​សណ្ដាប់ធ្នាប់សាធារណៈ ​និងសុវត្ថិភាពក្នុងពេលពិនិត្យបញ្ជីឈ្មោះ និង​ចុះឈ្មោះបោះឆ្នោតប្រចាំឆ្នាំ និងសម្រាប់សម័យបោះឆ្នោតនីមួយៗ ឲ្យទទួលបានជោគជ័យ ៕ អត្ថបទ៖បាន សុខរិទ្ធិ