រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz កាល​ពី​ថ្ងៃចន្ទ (ទី២៩ ខែមិថុនា ឆ្នាំ២០២៦) បានព្រមានថា អ៊ីស្រាអែលអាចនឹងផ្ទុះ​សង្គ្រាមជាមួយអ៊ីរ៉ង់យ៉ាង​ឆាប់បំផុត​​ នៅ​ «ថ្ងៃស្អែក» ដោយ​ការ​និយាយ​នេះ កើតមាន​​ស្រប​​ពេលដែល​ភាពតានតឹងក្នុងតំបន់ កើនឡើង។

អំឡុង​ពេល​ថ្លែងនៅ​ឯ​សន្និសីទសារព័ត៌មាន សម្រាប់អ្នកសារព័ត៌មានយោធា និងការទូត លោក Katz បាននិយាយថា អ៊ីស្រាអែលកំពុងតាមដានយ៉ាងដិតដល់នូវសភាព​ការណ៍​វិវត្តន៍​ និងត្រៀមខ្លួនយ៉ាងពេញលេញ សម្រាប់ការកើនឡើងនូវ​ភាព​តាន​តឹង​យ៉ាងឆាប់រហ័ស។ លោកបានព្រមានថា ការវាយប្រហារដោយមីស៊ីលណាមួយរបស់អ៊ីរ៉ង់ នឹងបង្កឱ្យមានការឆ្លើយតបភ្លាមៗ និងខ្លាំងក្លារបស់អ៊ីស្រាអែល ដោយហៅវាថា ជាបន្ទាត់ក្រហមច្បាស់លាស់ ដែលក៏ត្រូវបានទាក់​ទង​ផង​ដែរ​ទៅកាន់មន្ត្រីអាមេរិក​។

លោក Katz បាន​បញ្ជាក់​ទៀត​ថា យោធាអ៊ីស្រាអែលកំពុងស្ថិតក្នុងការប្រុងប្រយ័ត្នខ្ពស់ ដោយមានផែនការប្រតិបត្តិការរួចរាល់ និងគោលដៅ នាពេល​ខាង​មុខ​ ត្រូវបានកំណត់រួចហើយ។ លោកបានបន្ថែមថា លោកបានណែនាំយោធាឱ្យត្រៀមខ្លួន សម្រាប់ប្រតិបត្តិការ​ «ពណ៌ខៀវ និងពណ៌ស» របស់អ៊ីស្រាអែល នៅខាងក្នុងដែន​ដី​អ៊ីរ៉ង់ តែ​មិនបាន​ពន្យល់លម្អិតបន្ថែម។

ជាមួយគ្នា​នេះ​ លោកក៏បានលើក​ឡើង​ផងដែរថា កងកម្លាំងអ៊ីស្រាអែល នឹងមិនដកចេញឡើយ ពី «តំបន់សន្តិសុខ» ដែលត្រូវ​បានបង្កើតឡើង នៅក្នុងប្រទេសលីបង់ ស៊ីរី ឬតំបន់​ហ្កាហ្សា ទោះបីជាមានកិច្ចប្រឹងប្រែងផ្នែកការទូតជាបន្តបន្ទាប់ក៏ដោយ។

គួរបញ្ជាក់ថា ការកត់សម្គាល់បែប​នេះរបស់លោក Katz បានកើតឡើងបន្ទាប់ពីសហរដ្ឋអាមេរិក និងអ៊ីរ៉ង់បានវាយប្រហារតប​ត​គ្នា​ថ្មី កាលពីចុងសប្តាហ៍ ទោះបីជាមានអនុស្សរណៈនៃការយោគយល់គ្នា (MOU) ដែលបានចុះហត្ថលេខាថ្មីៗនេះក្ដី​។ កិច្ចព្រម​ព្រៀងនេះ​មានគោលបំណងបញ្ចប់ជម្លោះ នៅ​គ្រប់សមរភូមិ រួមទាំងប្រទេសលីបង់ផង​ដែរ​ ក៏ដូចជាបន្ត​ការចរចាឆ្ពោះទៅរកកិច្ចព្រមព្រៀងចុងក្រោយ៕