ការឈ្លានពាន និងការវាយប្រហាររបស់អ៊ីស្រាអែលទៅលើខេត្ត Quneitra និងខេត្ត Deraa ភាគខាងត្បូងប្រទេសស៊ីរី កាលពីថ្ងៃអាទិត្យ បានធ្វើឱ្យមានការព្រួយបារម្ភកាន់តែខ្លាំងឡើងនៅទូទាំងតំបន់។

នៅប្រទេសទួរគី៖ ក្រសួងការបរទេសទួរគីបាននិយាយថា សកម្មភាពរបស់អ៊ីស្រាអែល បានរំលោភលើបូរណភាពទឹកដី ការឯកភាព និងអធិបតេយ្យភាពរបស់ប្រទេសស៊ីរី ពួកគេបានជាន់ឈ្លីជីវិតនិងទ្រព្យសម្បត្តិរបស់ប្រជាជនស៊ីរី និងធ្វើឱ្យជីវិតជនស៊ីវិលនៅក្នុងតំបន់កាន់តែលំបាក។

ប្រទេសអារ៉ាប៊ីសាអ៊ូឌីត៖ ទីក្រុងរីយ៉ាដ បានច្រានចោលទាំងស្រុងចំពោះការបំភិតបំភ័យជនស៊ីវិលស្លូតត្រង់ដោយកងកម្លាំងអ៊ីស្រាអែល និងការរំលោភច្បាប់និងបទដ្ឋានអន្តរជាតិរបស់ពួកគេ។

ប្រទេសកូវ៉ែត៖ ក្រសួងការបរទេសកូវ៉ែត បានថ្កោលទោសការវាយប្រហាររបស់អ៊ីស្រាអែល ដោយនិយាយថា «ការបន្តអនុវត្តទាំងនេះ បង្ហាញពីការធ្វើឱ្យអន្តរាយដល់កិច្ចខិតខំប្រឹងប្រែងក្នុងគោលបំណងរក្សាសន្តិសុខ និងស្ថិរភាព»។

សម្ព័ន្ធអារ៉ាប់៖ អគ្គលេខាធិការ លោក Ahmed Aboul Gheit បានព្រមានថា ការរំលោភបំពានជាបន្តបន្ទាប់ដោយកងកម្លាំងអ៊ីស្រាអែលប្រឈមនឹងហានិភ័យនៃការបញ្ឆេះជម្លោះនៅក្នុងតំបន់ទាំងមូល។

ចំណែកក្រុមប្រឹក្សាសហប្រតិបត្តិការឈូងសមុទ្រ (GCC) និយាយថា ការវាយប្រហារដោយកងកម្លាំងអ៊ីស្រាអែល ជា «ការរំលោភបំពានជាក់ស្តែង» និងបង្ហាញពី «ការរីកធំជម្លោះដ៏គ្រោះថ្នាក់» ដែលនឹងបង្កើនភាពតានតឹង និងអស្ថិរភាពនៅក្នុងតំបន់ នេះបើតាមការលើកឡើងរបស់អគ្គលេខាធិការ លោក Jasem Mohamed AlBudaiwi នៅក្នុងសេចក្តីថ្លែងការណ៍មួយ។