ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទបានអនុម័តសេចក្តីសម្រេចមួយដើម្បីបន្ថែមរបបទណ្ឌកម្មលើសាធារណរដ្ឋប្រជាធិបតេយ្យកុងហ្គោ (DRC) រយៈពេលមួយឆ្នាំរហូតដល់ថ្ងៃទី១ ខែកក្កដា ឆ្នាំ២០២៧។

សេចក្តីសម្រេចរបស់ក្រុមប្រឹក្សាសន្តិសុខ បានដាក់បម្រាមអាវុធលើក្រុមប្រដាប់អាវុធនៅក្នុងប្រទេសកុងហ្គោ បម្រាមធ្វើដំណើរលើបុគ្គល និងការបង្កកទ្រព្យសម្បត្តិរបស់បុគ្គល និងអង្គភាពមួយចំនួនដែលត្រូវបានកំណត់ដោយគណៈកម្មាធិការទណ្ឌកម្មសាធារណរដ្ឋប្រជាធិបតេយ្យកុងហ្គោ។

សេចក្តីសម្រេចលេខ ២៨២៥ ដែលទទួលបានការគាំទ្រជាឯកច្ឆ័ន្ទពីក្រុមប្រឹក្សាដែលមានសមាជិក១៥រូប ក៏បានបន្ថែមអាណត្តិរបស់ក្រុមអ្នកជំនាញដែលជួយគណៈកម្មាធិការទណ្ឌកម្មសាធារណរដ្ឋប្រជាធិបតេយ្យកុងហ្គោរហូតដល់ថ្ងៃទី១ ខែសីហា ឆ្នាំ២០២៧។ សេចក្តីសម្រេចនេះស្នើឱ្យក្រុមអ្នកជំនាញដាក់បញ្ជូនទៅកាន់ក្រុមប្រឹក្សាសន្តិសុខនូវរបាយការណ៍ពាក់កណ្តាលអាណត្តិមិនឱ្យលើសពីថ្ងៃទី៣០ ខែធ្នូ ឆ្នាំ ២០២៦ និងរបាយការណ៍ចុងក្រោយមិនឱ្យលើសពីថ្ងៃទី១៥ ខែមិថុនា ឆ្នាំ២០២៧។

សេចក្តីសម្រេចបានរំលឹកឡើងវិញនូវការប្តេជ្ញាចិត្តរបស់អគ្គលេខាធិការអង្គការសហប្រជាជាតិថា អង្គការសហប្រជាជាតិនឹងធ្វើអ្វីគ្រប់យ៉ាងដែលអាចធ្វើទៅបានដើម្បីធានាបានថា អ្នកប្រព្រឹត្តក្នុងការសម្លាប់សមាជិកពីរនាក់នៃក្រុមអ្នកជំនាញ និងពលរដ្ឋកុងហ្គោបួននាក់ដែលអមដំណើរ ត្រូវតែបាននាំខ្លួនមកកាត់ទោស។