កាលពី​ថ្ងៃចន្ទ (ទី២៩ ខែមិថុនា ឆ្នាំ២០២៦) សហភាពអឺរ៉ុប (EU) និងចិនបានព្រមព្រៀងគ្នាចាប់ផ្តើមកិច្ចសន្ទនាកម្រិតខ្ពស់ថ្មីមួយ ដែលមានគោលបំណងធ្វើឱ្យមានស្ថិរភាព និងតុល្យភាពឡើងវិញនូវទំនាក់ទំនងពាណិជ្ជកម្ម និងវិនិយោគរបស់ភាគីទាំង២ បន្ទាប់ពីមាន​នូវកិច្ចប្រជុំលើកដំបូងនៃការពិគ្រោះយោបល់ពាណិជ្ជកម្ម និងវិនិយោគ រវាង EU និងចិន (TIC) នៅទីក្រុងប៊្រុចសែល ប្រទេស​បែលហ្ស៊ិក​។

ស្នងការពាណិជ្ជកម្ម EU លោក Maros Sefcovic និងរដ្ឋមន្ត្រីក្រសួងពាណិជ្ជកម្មចិន លោក Wang Wentao បានជួបប្រជុំគ្នា និងឯកភាពគ្នាថា គោលបំណងសំខាន់នៃយន្តការថ្មីនេះ គឺដើម្បីពង្រឹងកិច្ចសន្ទនាកម្រិតរដ្ឋមន្ត្រីស្តីពីគោលនយោបាយពាណិជ្ជកម្ម និងវិនិយោគ ដោយផ្តោតលើការបង្កើតទំនាក់ទំនងសេដ្ឋកិច្ចដែលមានស្ថិរភាព និងតុល្យភាពបន្ថែម​ទៀត​។

យោងតាមសេចក្តីថ្លែងការណ៍រួម បាន​ឲ្យ​ដឹង​ថា ភាគីទាំង២ បានទទួលស្គាល់ពី​ការ​មាន​បញ្ហាប្រឈមនានា ក្នុងទំនាក់ទំនងពាណិជ្ជកម្ម និងប្តេជ្ញាស្វែងរកដំណោះស្រាយជាក់ស្តែង។

ភាគីទាំង​២ បានកំណត់ប្រធាន​បទ​សំខាន់ៗដំបូងចំនួន ៤ ក្រោមការពិគ្រោះយោបល់ទាំងនេះ ដែល​មាន​តុល្យភាពពាណិជ្ជកម្ម និងវិនិយោគ ការគ្រប់គ្រងការនាំចេញ សិទ្ធិកម្មសិទ្ធិបញ្ញា និងកំណែទម្រង់អង្គការពាណិជ្ជកម្មពិភពលោក (WTO)។

មន្ត្រីត្រូវបានប្រគល់ភារកិច្ចឱ្យជំរុញការងារ នៅក្នុងវិស័យទាំងនោះ ដោយរដ្ឋមន្ត្រីត្រូវបានគេរំពឹងថា នឹងជួបប្រជុំគ្នានៅរដូវស្លឹកឈើជ្រុះ៕