នគរបាល​សហព័ន្ធអូស្ត្រាលីបានឲ្យ​ដឹង​ថា បុគ្គលិកក្រុមហ៊ុនអាកាសចរណ៍ថៃមួយ​រូប ត្រូវបានចោទប្រកាន់ពីបទនាំចូលគ្រឿង​ញៀនជាង ១គីឡូក្រាម ចូលក្នុង​ទឹក​ដី​របស់​ប្រទេសអូស្ត្រាលី បន្ទាប់ពីមន្ត្រីគយបានរកឃើញគ្រឿងញៀនលាក់ទុកក្នុងកាបូបកាន់​ដៃ​។

នគរបាល​បាន​បញ្ជាក់​ថា នារី​អាយុ ២៦ឆ្នាំរូបនេះ ដែលក្រុមហ៊ុនអាកាសចរណ៍ជាតិថៃ គឺ Thai Airways បានប្រាប់​ថា កំពុងធ្វើការជាអ្នកបម្រើលើយន្តហោះ នៅពេលដែលរូប​នាង​ទៅ​ដល់អាកាសយានដ្ឋានមែលប៊ន (Melbourne Airport) កាល​ពី​ថ្ងៃទី២៥ ខែមិថុនា មានកាបូប​កាន់ដៃ​ចំនួន ១២ ត្រូវបានត្រួតពិនិត្យដោយមន្ត្រីព្រំដែន។

គ្រឿង​ញៀន​ ដែលត្រូវបានរកឃើញលាក់ទុកនៅ​ក្នុងកាបូប​ទាំង​នោះ​ ត្រូវបាន​ប៉ាន់ប្រមាណថា មាន​​តម្លៃ ៥០០.០០០ដុល្លារអូស្ត្រាលី (ប្រមាណ ៣៤៤.០០០ដុល្លារអាមេរិក)។

នារី​រូបនេះប្រឈមនឹងបទ​ចោទ​ការនាំចូល ១ករណី និង ១ករណីទៀតពីបទកាន់កាប់គ្រឿងញៀនដែលគ្រប់គ្រងដោយព្រំដែន ក្នុងបរិមាណដែលអាចលក់បាន​។ ការចោទប្រកាន់ករណី​នីមួយៗ ត្រូវ​ផ្តន្ទាទោសជាប់ពន្ធនាគារអតិបរមា ២៥ឆ្នាំ។ រូប​នាងត្រូវបានឃុំខ្លួនកាលពី​ថ្ងៃទី២៦ ខែមិថុនា ហើយត្រូវចូលបង្ហាញខ្លួន នៅចំពោះមុខតុលាការ Melbourne Magistrates’ Court នៅថ្ងៃទី១៤ ខែកញ្ញា៕