មន្ត្រីមូលដ្ឋានមួយរូបបានឱ្យ​ដឹង​ថា នគរបាល នៅរដ្ឋ​ Monaco និងប្រទេសជិតខាងបារាំង កំពុងតាម​ស្វែងរកបុរសម្នាក់ ដែលត្រូវបាន​សង្ស័យថា បានបំផ្ទុះគ្រាប់បែកកែច្នៃ​ នៅភាគ​កណ្តាលនៃដែន​ដី​តំបន់​​មេឌីទែរ៉ាណេមួយ​នេះ​ កាល​ថ្ងៃចន្ទ (ទី២៩ ខែមិថុនា ឆ្នាំ២០២៦) ជាហេតុការណ៍ដែល​បានធ្វើឱ្យមនុស្សជាច្រើននាក់រងរបួស។

លោក Christophe Mirmand រដ្ឋមន្ត្រីរបស់​រដ្ឋ Monaco បានប្រាប់ប្រព័ន្ធ​ផ្សព្វផ្សាយ​ BFM TV ថា ជនរងគ្រោះ ២នាក់ បានរងរបួសគំរាម​កំហែង​ដល់​ជីវិត​។ ចំណែក​ក្រសួងមហាផ្ទៃបារាំងបានឲ្យ​ដឹង​ថា សេវាសង្គ្រោះបន្ទាន់បារាំងត្រូវបានដាក់បញ្ជូន​ទៅ​កន្លែងកើតហេតុ ដើម្បីផ្តល់ជំនួយ ហើយប្រតិបត្តិការនគរបាល​រួមគ្នា កំពុងដំណើរការ ដើម្បីតាមរក​ជនរត់គេចខ្លួន។

លោក Mirmand បានប្រាប់បណ្ដាញ​ព័ត៌មានបារាំងថា «មិនធ្លាប់មានហេតុការណ៍បែបនេះកើតឡើងនៅក្នុងតំបន់នេះពីមុនមកទេ»។

ការផ្ទុះនេះបានកើតឡើងមុនម៉ោង ៩យប់ (ម៉ោង​ក្នុង​ស្រុក​​) នៅភាគ​កណ្តាលរដ្ឋ Monaco។ សារព័ត៌មាន​បារាំង Le Figaro បានចុះផ្សាយ​ថា រូបភាពវីដេអូឃ្លាំមើល បានបង្ហាញឲ្យ​ឃើញ​ពីបុរសម្នាក់ទម្លាក់កាបូបស្ពាយ នៅច្រកចូលអគារលំនៅឋាន​មួយកន្លែង​ មុនពេលមានការផ្ទុះឡើង​៕