​​ធនាគារពិភពលោក (WB) បានឱ្យដឹង​​កាលពី​ថ្ងៃចន្ទ (ទី២៩ ខែមិថុនា ឆ្នាំ២០២៦) ថា ខ្លួននឹង «ទម្លាក់​ចោល​​» គោលដៅពី​មុនរបស់ខ្លួន ក្នុងការលៃ​ទុក​ធនធាន ដើម្បី​ផ្តល់ប្រាក់កម្ចីប្រចាំឆ្នាំចំនួន ៤៥ភាគរយដល់គម្រោងដែលផ្ដល់​អត្ថប្រយោជន៍រួម ទាក់ទងនឹងអាកាសធាតុ ប៉ុន្តែនឹងពង្រីកផែនការសកម្មភាពបម្រែបម្រួល​អាកាសធាតុរយៈពេលយូររបស់ខ្លួន ដែលគ្រោងផុតកំណត់នៅថ្ងៃទី៣០ ខែមិថុនានេះ​។

ធនាគារអភិវឌ្ឍន៍មួយ​នេះ​ ដែលស្ថិតនៅក្រោមសម្ពាធពីរដ្ឋបាលលោកប្រធានធិបតី Donald Trump ឱ្យបោះបង់ចោលគោលដៅផ្តល់ប្រាក់កម្ចីពាក់​ព័ន្ធ​នឹង​អាកាសធាតុ ដែលត្រូវបាន​អនុម័តអំឡុងរដ្ឋបាលរបស់​លោក Joe Biden ក្នុងឆ្នាំ២០២៣ បានឲ្យ​ដឹង​នៅក្នុងសេចក្តីថ្លែងការណ៍មួយថា ខ្លួននឹងបញ្ចប់ទាំង​ស្រុងនូវ​ការប្តូរ​ទៅផ្តោតលើលទ្ធផលផ្តល់​ប្រាក់កម្ចី ជាជាងគោលដៅដាក់​បញ្ចូល។

ប្រមុខធនាគារពិភពលោក លោក Ajay Banga ដែលដំបូងឡើយត្រូវបានប្រគល់​ភារកិច្ច​ឲ្យបង្កើន​​​ធនធានផ្តល់ប្រាក់កម្ចីអាកាសធាតុបន្ថែមទៀតពី​​តារាងតុល្យការរបស់ធនាគារ បានប្តូរការផ្តោតរបស់លោកទៅ «ការអភិវឌ្ឍឆ្លាតវៃ» ដែលមានគោលបំណងជំរុញឱកាសការងារ ខណៈពេលដែលនៅតែផ្តល់អត្ថប្រយោជន៍ទាក់ទងនឹងអាកាសធាតុ ដូចជាកសិកម្មធន់នឹងគ្រោះរាំងស្ងួត ឬហេដ្ឋារចនាសម្ព័ន្ធធន់នឹងព្យុះ និងថាមពលកកើតឡើងវិញដែល​សមស្រប។

ធនាគារពិភពលោក បានបន្ថែម​ថា តាមសំណើរបស់ក្រុមប្រឹក្សាភិបាលប្រតិបត្តិរបស់ស្ថាប័ន​ ក្រុមវាយតម្លៃឯករាជ្យរបស់ស្ថាប័ន​ផ្តល់ប្រាក់កម្ចីមួយនេះ នឹងធ្វើការពិនិត្យឡើងវិញនូវផែនការសកម្មភាពបម្រែបម្រួល​អាកាសធាតុ (CCAP) ដោយ​គ្រោងការនេះ​ត្រូវបានអនុម័តជាលើកដំបូងនៅក្នុងផែនការ​ ៥ឆ្នាំដែល​មាន​ការ​កែសម្រួល​​ជាប់រហូត​ ក្នុងឆ្នាំ២០១៦៕