កងទ័ពអ៊ីស្រាអែល បានកម្ទេចអគារ និងរចនាសម្ព័ន្ធស៊ីវិល នៅទូទាំងភាគខាងជើង និងភាគខាងត្បូងនៃ​តំបន់​ហ្កាហ្សា នាព្រឹកថ្ងៃអង្គារ (ទី៣០ ខែមិថុនា ឆ្នាំ២០២៦) នេះ អមដោយការបាញ់ផ្លោងកាំភ្លើងធំ និងការបាញ់ប្រហារយ៉ាងខ្លាំង នៅក្នុងតំបន់ដែលស្ថិតនៅក្រោមការគ្រប់គ្រងរបស់ខ្លួន។

ការកម្ទេចទាំងនេះបានកើតឡើង ក្នុង​ពេលមានការរំលោភបំពាន​ជាបន្តបន្ទាប់ដោយ​អ៊ីស្រាអែល លើបទឈប់បាញ់ ដែលបានចូលជាធរមាននៅថ្ងៃទី១០ ខែតុលា ឆ្នាំ២០២៥។ ប្រភពមូលដ្ឋាន​ និងសាក្សី បានប្រាប់សារព័ត៌មាន​ Anadolu ថា កងកម្លាំងអ៊ីស្រាអែលបានធ្វើ​ការ​បំផ្លិច​បំផ្លាញទ្រង់ទ្រាយធំ លើ​​ផ្ទះសម្បែង​ និងរចនាសម្ព័ន្ធដែលនៅសេសសល់ចំនួន ៣កន្លែង ភាគឦសានទីក្រុង​ Khan Younis នៅភាគខាងត្បូងតំបន់ហ្កាហ្សា។

ការកម្ទេចទាំងនេះ បានកើតឡើងស្របគ្នាជាមួយនឹងការបាញ់ប្រហារយ៉ាងខ្លាំងចេញ​ពីរថយន្ត​យោធាអ៊ីស្រាអែល ខណៈពេលដែលកាំភ្លើងធំ បានបាញ់ផ្លោងលើ​តំបន់ភាគពាយ័ព្យនៃទីក្រុង​ Rafah នៅភាគខាងត្បូងតំបន់ហ្កាហ្សា។ នៅភាគខាងជើងហ្កាហ្សា សាក្សីបាននិយាយថា ពួកគេបានឮសំឡេងផ្ទុះដ៏ធំមួយដែលបណ្តាលមកពីប្រតិបត្តិការកម្ទេចរបស់អ៊ីស្រាអែល នៅជិតចំណុចប្រសព្វ Al-Sanafour ក្នុងសង្កាត់ Al-Tuffah ភាគខាងកើតនៃទីក្រុងហ្កាហ្សា។

គួរបញ្ជាក់ថា ក្នុងរយៈពេលប៉ុន្មានសប្តាហ៍ថ្មីៗនេះ កងទ័ពអ៊ីស្រាអែលបានពង្រីកការគ្រប់គ្រងរបស់ខ្លួន នៅទូទាំងផ្នែកជាច​រើន​នៃតំបន់ហ្កាហ្សាស្ទ្រីប ដោយរំកិលរបាំងបេតុងទៅទិសខាងលិច ជា​ទី​សម្គាល់នូវ​អ្វីដែលហៅថា «ខ្សែបន្ទាត់​ពណ៌លឿង» ដោយពង្រីកតំបន់ហាមឃាត់ និងបង្ខំឱ្យជនជាតិប៉ាឡេស្ទីនកាន់តែច្រើនរត់គេចខ្លួន។

យោងតាមអាជ្ញាធរសុខាភិបាលតំបន់​ហ្កាហ្សា បាន​ឲ្យ​ដឹង​ថា ការរំលោភបំពានរបស់អ៊ីស្រាអែល ចាប់តាំងពីបទឈប់បាញ់ចូលជាធរមាន បានសម្លាប់ជនជាតិប៉ាឡេស្ទីនចំនួន ១.០៤៥នាក់ និងធ្វើឱ្យ ៣.៣៨០0នាក់ផ្សេងទៀតរងរបួស ដែលភាគច្រើនជាស្ត្រី និងកុមារ៕