រដ្ឋមន្ត្រីការបរទេសចិន នឹងធ្វើទស្សនកិច្ចជាផ្លូវការ នៅ​​ប្រទេសអឺរ៉ុបខាង​ជើង​ចំនួន ៤ នា​សប្តាហ៍នេះ ខណៈដែលទីក្រុងប៉េកាំងកំពុងស្វែងរកការចូលរួមនយោបាយកាន់តែស៊ីជម្រៅ និងពង្រីកកិច្ចសហប្រតិបត្តិការជាមួយតំបន់នេះ ស្រប​ពេលមានការប្រែប្រួលនៃសក្ដានុភាពភូមិសាស្ត្រនយោបាយ និងសេដ្ឋកិច្ចសកល​។

អ្នកនាំពាក្យក្រសួងការបរទេស លោក Guo Jiakun បាននិយាយនៅ​ថ្ងៃអង្គារ (ទី៣០ ខែមិថុនា ឆ្នាំ២០២៦) នេះថា លោក Wang Yi នឹងបំពេញ​ទស្សនកិច្ចនៅ​ដាណឺម៉ាក ស៊ុយអែត ហ្វាំងឡង់ និងន័រវ៉ែស នៅថ្ងៃទី ២-៨ ខែកក្កដា តាមការអញ្ជើញរបស់រដ្ឋមន្ត្រីការបរទេសនៃ​ប្រទេស​ទាំងនោះ​។

លោក Guo បានឲ្យដឹង​ទៀត​ថា ប្រទេសទាំង ៤នេះ គឺជាស្ថិត​ក្នុងចំណោមប្រទេសអឺរ៉ុបដំបូងគេ ដែលទទួលស្គាល់សាធារណរដ្ឋប្រជាមានិតចិន និងបង្កើតទំនាក់ទំនងការទូត ដែលផ្តល់ឱ្យភាគីទាំង២ នូវ «ប្រវត្តិសាស្ត្រដ៏ជ្រាលជ្រៅនៃចំណងមិត្តភាព»។

លោកបានបន្ថែម​ថា ទំនាក់ទំនងជាមួយ​ប្រទេស​ទាំង​នេះ បានអភិវឌ្ឍជាលំដាប់ក្នុងប៉ុន្មានឆ្នាំថ្មីៗនេះ ដោយកិច្ចសហប្រតិបត្តិការបានពង្រីកក្នុង​ផ្នែក​ការ​​ផ្លាស់ប្តូរបៃតង ពាណិជ្ជកម្ម ការវិនិយោគ និងនវានុវត្តន៍​វិទ្យាសាស្ត្រ និងបច្ចេកវិទ្យា។ ភាគីទាំង២ ក៏មានការឯកភាពគ្នាយ៉ាងទូលំទូលាយ លើការគាំទ្រពហុភាគីនិយម ពាណិជ្ជកម្មសេរី និងការដោះស្រាយបញ្ហាបម្រែបម្រួល​អាកាសធាតុ។

ក្នុងអំឡុងពេលនៃដំណើរទស្សនកិច្ច នៅប្រទេសទាំង​នេះ​ លោក Wang នឹងធ្វើកិច្ចពិភាក្សាជាមួយសមភាគី​របស់លោក ស្ដីពី​ទំនាក់ទំនងទ្វេភាគី ក៏ដូចជាបញ្ហាតំបន់ និងអន្តរជាតិដែលមាន​ផលប្រយោជន៍ឱ្យ​គ្នា​ទៅវិញទៅមក៕