ភ្នំពេញ៖ មន្រ្តីជំនាញនៃគណៈកម្មាធិការជាតិគ្រប់គ្រងគ្រោះមហន្តរាយ បានក្រើនរម្លឹកដល់ប្រជាពលរដ្ឋត្រូវប្រុងប្រយ័ត្នបាតុភូតធម្មជាតិដូចជា ផ្គរ រន្ទះ និងខ្យល់កន្រ្តាក់ជាដើមនោះ ខណៈបច្ចុប្បន្នភ្លៀងបន្តធ្លាក់រាយប៉ាយនៅទូទាំងប្រទេស និងរដូវវស្សាចូលមកដល់នៅខែឧសភាខាងមុខនេះ។

នៅថ្ងៃទី២៩ ខែមេសានេះ លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រង់​គ្រោះ​មហន្តរាយ បានឱ្យដឹងថា ដើម្បីបង្ករទុកជាមុននៃគ្រោះមហន្តរាយនៅរដូវវស្សា គណៈកម្មាធិការជាតិ​គ្រប់គ្រង់គ្រោះមហន្តរាយ បានត្រៀមលក្ខណៈរួចរាល់ទាំងថ្នាក់ជាតិ ​និងថ្នាក់ក្រោមជាតិ។ការត្រៀមលក្ខណៈនោះមានដូចជា៖ សំភារៈបរិក្ខារ ស្បៀងអាហារ ​និងកងកម្លាំងជាដើម។លើសពីនេះ ​លោកបានអំពាវនាវដល់ប្រជាពលរដ្ឋ ត្រូវប្រុងប្រយ័ត្ន​ចំពោះបាតុភូតជាតិ ផ្គរ រន្ទះ និងខ្យល់កន្រ្តាក់ ​ខណៈរដូវវស្សានឹងចូលមកនៅខែឧសភា ​ហើយនៅដើមរដូវវស្សានេះទៀតសោត និងមានផ្គរ រន្ទះខ្លាំងៗ។

ប្រទេសកម្ពុជាកំពុងទទួលរងឥទ្ធិពល អាកាសធាតុឡានីណា ក្នុងកម្រិតខ្ពស់ដល់ខែឧសភា ទើប​មានការប្រែប្រួល ហើយស្ថានភាពនេះ បានធ្វើឱ្យអាកាសធាតុមិនក្តៅខ្លាំង ​និងមានភ្លៀងកក់ខែ ធ្លាក់រាយប៉ាយតិចច្រើនសឹកគ្រប់ខេត្ត ​ដែលអំណោយផលល្អច្រើនដល់វិស័យកសិកម្ម។ ភ្ញៀងកក់ខែបានកាត់បន្ថយជាអតិបរមាការប្រឈមនឹងការខ្វះខាតទឹក​ ដែលបានកើតមានពីដើមឆ្នាំ ហើយក៏​បានបង្កលក្ខណៈងាយស្រួលដល់កសិករ ក្នុងការបង្កើនបរិមាណនៃការ​ដាំដុះ​ស្រូវប្រាំង​ផងដែរ។ ​នេះបើតាមរបាយការណ៍របស់គណៈកម្មាធិការជាតិគ្រប់គ្រង់គ្រោះមហន្តរាយ។

របាយការណ៍ ដដែលបន្តថា ក្នុងខែមីនា ​ឆ្នាំ២០២២ ​នៅក្នុងអន្តរកាលនៃរដូវរំហើយ​ និងរដូវប្រាំង ភ្លៀងកក់ខែ​បានធ្លាក់រាយប៉ាយក្នុងកម្រិតពីតិចទៅបង្គួរនៅតាមបណ្តាខេត្តជាច្រើន ជាមួយនឹងការ​កើត​មានផ្គរ រន្ទះ ​និងខ្យល់​បក់បោកខ្លាំងជាបន្តបន្ទាប់ ​ដែលបណ្តាលឱ្យ ផ្ទះរលំ​ និងខូច​ធ្ងន់ធ្ងរ ២២០ខ្នង ​ផ្ទះរបើកដំបូល​ និងខូចមធ្យម៨៥៦ខ្នង ​របើកដំបូលសាលារៀន ​៩អគារ មណ្ឌលសុខភាព១អគារ រងគ្រោះស្លាប់២នាក់ ​និងរបួស៦នាក់។

ដោយឡែករងគ្រោះដោយសារន្ទះបាញ់ស្លាប់មនុស្សចំនួន ៣នាក់ និងរបួស៤នាក់​ ខូចផ្ទះ២ខ្នង និងងាប់គោក្របី៥ក្បាល៕អត្ថបទ៖ ទូច សោភ័ណ