យោងតាមការវាយតម្លៃបឋមពី​ទិន្នន័យផ្កាយរណប ដែលត្រូវ​ចេញផ្សាយដោយទីភ្នាក់ងារអវកាសអាមេរិក NASA បាន​ឲ្យ​ដឹងថា រញ្ជួយដីដ៏ខ្លាំងក្លាចំនួន​២ ដែលបានវាយប្រហារប្រទេសវ៉េណេស៊ុយអេឡា កាលពីសប្តាហ៍មុន បានបង្ក​ការ​ខូចខាត ឬបំផ្លាញអគារជាង ៥៨.០០០ខ្នង។

មនុស្សប្រហែល ១.៧០០នាក់ បានបាត់​បង់ជីវិត​ និងរាប់ពាន់នាក់នៅតែបាត់ខ្លួន បន្ទាប់ពីមាន​រញ្ជួយដី ៧,២ និង ៧,៥ រ៉ិចទ័រ ជាកម្រិតខ្លាំងបំផុតដែលបានវាយប្រហារប្រទេសតំបន់​អាមេរិកខាងត្បូងជាលើក​ដំបូង​ ក្នុងរយៈពេលជាង ១សតវត្សរ៍។

ដោយផ្អែកលើទិន្នន័យរ៉ាដាផ្កាយរណបដែលប្រមូលបាននៅថ្ងៃទី២៥ ខែមិថុនា មួយថ្ងៃបន្ទាប់ពីមាន​រញ្ជួយដី អ្នកស្រាវជ្រាវ លោក​ Corey Scher និងលោក Jamon Van Den Hoek មកពីសាកលវិទ្យាល័យរដ្ឋ Oregon បានឱ្យ​ដឹង​ថា៖ «អគារប្រហែល ៥៨.៨៧០ខ្នង​ ទំនងជារងការខូចខាត ឬបំផ្លាញ នៅទូទាំងតំបន់ដែលរងផលប៉ះពាល់»។

អ្នកទាំង២ បានដកស្រង់ទិន្នន័យពីផ្កាយរណបរូបភាពរ៉ាដាដែលមានគុណភាពរបស់ទីភ្នាក់ងារអវកាសអឺរ៉ុប Sentinel-1។

ចំណែក​លោក Jorge Rodriguez ប្រធានរដ្ឋសភាវ៉េណេហ្ស៊ុយ​អេឡា បានរាយការណ៍កាល​ពី​ថ្ងៃចន្ទថា អគារចំនួន ៨៥៥ខ្នង​ បានរង​ខូចខាត ក្នុង​នោះ​រួមទាំង «អគារដួលរលំសរុប ១៨៩ខ្នង» ផង​ដែរ​។

អង្គការ NASA បានឲ្យ​ដឹង​ថា ផ្កាយរណបរបស់ខ្លួន កំពុង «ផ្តល់ការគាំទ្រសំខាន់ ចាប់យករូបភាព និងទិន្នន័យ ដើម្បីជួយក្រុមនៅនឹងកន្លែងវាយតម្លៃផលប៉ះពាល់ និងណែនាំកិច្ចប្រឹងប្រែងឆ្លើយតប​»៕