លោកប្រធានាធិបតី Volodymyr Zelenskyy បានបញ្ជាក់​ឱ្យ​ដឹង​ថា យោធាអ៊ុយក្រែន បានវាយប្រហារជាលើកទី២ លើ​មជ្ឈមណ្ឌលទំនាក់ទំនងផ្កាយរណប Dubna របស់រុស្ស៊ី នៅក្នុងតំបន់មូស្គូ នាថ្ងៃអង្គារ (ទី​៣០ ខេមិថុនា ឆ្នាំ២០២៦) ជា​យុទ្ធនាការវាយប្រហារកាន់តែទូលំទូលាយដែលផ្តោតលើទីតាំងបែបនេះ។

ដោយសំដៅទៅលើការវាយប្រហាររបស់អ៊ុយក្រែនចូល​ជ្រៅទៅ​ក្នុងទឹកដីរុស្ស៊ី លោក Zelenskyy បានឱ្យ​ដឹង​នៅលើកម្មវិធីផ្ញើសារ​ Telegram ថា៖ «ថ្ងៃនេះ ការ​ដាក់​ទណ្ឌកម្មរយៈចម្ងាយ​ឆា្ងយ​របស់យើង ប្រឆាំងនឹងរុស្ស៊ី សម្រាប់សង្គ្រាមនេះ បានទៅដល់មជ្ឈមណ្ឌលទំនាក់ទំនងអវកាស Dubna នៅក្នុងតំបន់មូស្គូម្តងទៀត​»។

លោក Zelenskyy បានបន្ត​ថា ទីតាំងនេះ ដែលមានចម្ងាយជាង ៥០០គីឡូម៉ែត្រ ពីព្រំដែនអ៊ុយក្រែន ត្រូវបានប្រើសម្រាប់ការឈ្លបយកការណ៍ និងសម្របសម្រួលសកម្មភាពរបស់កងកម្លាំងរុស្ស៊ី នៅអ៊ុយក្រែន។

អគ្គសេនាធិការយោធាអ៊ុយក្រែន បាន​ប្រាប់​ថា ទីតាំង​នេះ​ក៏បានរងការវាយប្រហារដោយ​អ៊ុយក្រែនផង​ដែរ កាលពីសប្តាហ៍មុន។ ហើយ​លោក Zelenskyy បានបន្ថែមថា កងកម្លាំងអ៊ុយក្រែន ទើបតែវាយប្រហារមជ្ឈមណ្ឌលរុស្ស៊ីស្រដៀងគ្នាចំនួន ៤ នៅក្នុងតំបន់មូស្គូ និង Vladimir។

កាលពីសប្តាហ៍មុន ប្រធានាធិបតីអ៊ុយក្រែនបានលើកឡើង​ថា លោកបានអនុម័តយុទ្ធនាការរយៈពេល ៤០ថ្ងៃ ដើម្បី «បង្ខំ​» ឱ្យ​​រុស្ស៊ីព្រម​បញ្ចប់សង្គ្រាមរបស់ខ្លួន លើ​អ៊ុយក្រែន ដែលឥឡូវនេះស្ថិតនៅក្នុងឆ្នាំទី ៥ ហើយ​។

អ៊ុយក្រែនបានបង្កើនការវាយប្រហារលើហេដ្ឋារចនាសម្ព័ន្ធយោធា និងថាមពលរបស់រុស្ស៊ី ដោយយាន​ដ្រូន​ ក្នុងរយៈពេលប៉ុន្មានខែថ្មីៗនេះ ដែលនាំ​ឲ្យមាន​ការខ្វះខាតប្រេងឥន្ធនៈនៅក្នុងតំបន់ខ្លះនៃប្រទេសរុស្ស៊ី៕