​

ទីភ្នាក់ងារពាណិជ្ជកម្ម និងអភិវឌ្ឍន៍របស់អង្គការសហប្រជាជាតិ (UN) បានព្រមាននៅ​ថ្ងៃអង្គារ (ទី៣០ ខែមិថុនា ឆ្នាំ២០២៦) នេះ​ថា ខណៈពេលដែលការបើកច្រកសមុទ្រ Hormuz ឡើងវិញ នឹងនាំមកនូវការធូរស្បើយភ្លាមៗ ចំពោះ​ទីផ្សារថាមពល សេដ្ឋកិច្ចដែលងាយរងគ្រោះ នៅតែស្ថិតក្នុងហានិភ័យ ដោយសារ​ការកើនឡើងរយៈពេល​យូរ​ សម្រាប់​ការ​ចំណាយ​លើ​តម្លៃ​អាហារ និងប្រេងឥន្ធនៈ។

សន្និសីទអង្គការសហប្រជាជាតិ​ ស្តីពីពាណិជ្ជកម្ម និងការ​អភិវឌ្ឍ (UNCTAD) បានលើក​ឡើង​នៅក្នុងរបាយការណ៍ថ្មីមួយថា ប្រព័ន្ធអាហារ និងដឹកជញ្ជូន ទំនងជាចំណាយពេលយូរជាងទីផ្សារថាមពល ដើម្បីងើបឡើងវិញ ខណៈដែលខ្សែច្រវាក់ផ្គត់ផ្គង់ដែលរងផលប៉ះពាល់ ត្រូវការពេលវេលាបន្ថែមទៀត ដើម្បីកំណត់ឡើងវិញ បន្ទាប់ពីមាន​ការរំខានយ៉ាងធ្ងន់ធ្ងរជាង ១០០ថ្ងៃ ចំពោះការដឹកជញ្ជូនតាមផ្លូវទឹកយុទ្ធសាស្ត្រនេះ​។

ច្រកសមុទ្រនេះ ដែលជាធម្មតាដឹកជញ្ជូនប្រហែល ១ភាគ៥ នៃការផ្គត់ផ្គង់ប្រេង និងឧស្ម័នសកល ត្រូវបានរារាំង​យ៉ាងមានប្រសិទ្ធភាព អំឡុង​ជម្លោះបង្កឡើងដោយការវាយប្រហាររួមគ្នា រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ កាល​ពី​ចុងខែកុម្ភៈ។

UNCTAD បាន​ឱ្យ​ដឹង​បន្ត​ថា ទោះបីជាប្រេងឆៅ Brent បានធ្លាក់ចុះយ៉ាងខ្លាំងមកត្រឹមតម្លៃ​ប្រហែល ៧៣ដុល្លារ ក្នុងមួយបារ៉ែល ជិតដល់កម្រិតមុនជម្លោះ បន្ទាប់ពីកិច្ចព្រមព្រៀងបណ្តោះអាសន្ន រវាងសហរដ្ឋអាមេរិក និងអ៊ីរ៉ង់ក៏ដោយ ក៏​ចំណាយ​ខ្ពស់​លើ​ប្រេងឥន្ធនៈ ឧស្ម័ន និងជី អាចបន្តប៉ះពាល់​បន្តិចម្ដងៗដល់ផលិតកម្មកសិកម្ម ថ្លៃដើមដឹកជញ្ជូន និងថវិកាគ្រួសារ។

បណ្ដាប្រទេស​មាន​សេដ្ឋកិច្ចងាយរងគ្រោះ នៅតែប្រឈម​នឹង​ការ​ប៉ះពាល់​ជាពិសេស ដោយសារ​វិបត្តិតម្លៃប្រេង និងជី ខណៈដែលតម្លៃអាហារឡើង​ខ្ពស់ជាលំដាប់​ អាចដាក់សម្ពាធបន្ថែមទៀត លើគ្រួសារក្រីក្រ។ UNCTAD បានបន្ថែម​ថា ការកើនឡើង ៥ភាគរយនៃតម្លៃអាហារ អាចបង្កើនហានិភ័យធ្វើ​ឲ្យ​កុមារខ្វះ​អាហារូបបត្ថម្ភធ្ងន់ធ្ងរ​​៕