អ្នកនាំពាក្យក្រសួងការបរទេសកាតា នៅថ្ងៃអង្គារ (ទី៣០ ខែមិថុនា ឆ្នាំ២០២៦) នេះ បាន​បញ្ជាក់​ឱ្យដឹង​ថា បេសកជនអាមេរិក លោក Steve Witkoff និងកូនប្រសាររបស់លោកប្រធានាធិបតី Donald Trump គឺលោក Jared Kushner នឹងមាន​វត្តមាន​នៅ​ទីក្រុងដូហា ដើម្បីជួបជាមួយក្រុមអ្នកសម្របសម្រួលកាតា ដោយមាន​គោល​បំណង​ពិភាក្សា អំពីការចរចា រវាងសហរដ្ឋអាមេរិក និងអ៊ីរ៉ង់។

តែ​លោក Majed Al Ansari បានប្រាប់សន្និសីទសារព័ត៌មានមួយថា នឹងមិនមានកិច្ចប្រជុំកម្រិតខ្ពស់ រវាងទីក្រុងវ៉ាស៊ីនតោន និងទីក្រុងតេអេរ៉ង់ទេ។

ហើយ​ជាមួយគ្នានេះ លោកក៏​បានឲ្យ​ដឹង​ផង​ដែរ​ថា កាតាមិនទាន់បានផ្ទេរប្រាក់ត្រូវបាន​បង្កកចំនួន ៦ពាន់លានដុល្លាររបស់អ៊ីរ៉ង់ ទៅទីក្រុងតេអេរ៉ង់នៅឡើយទេ។

ទន្ទឹម​នឹង​នេះដែរ ទីក្រុងដូហាបានសម្របសម្រួលជាមួយប្រទេសអូម៉ង់ ដែលស្ថិតនៅឆ្នេរសមុទ្រភាគខាងលិចនៃច្រកសមុទ្រ Hormuz លើផ្លូវឆ្លងកាត់ដែលមានសុវត្ថិភាព សម្រាប់នាវា៕