ក្រសួងការបរទេស នៅទីក្រុងតូក្យូ បានឱ្យ​ដឹង​ថា នាយករដ្ឋមន្ត្រីជប៉ុន លោកស្រី​ Sanae Takaichi នឹងបំពេញទស្សនកិច្ច នៅប្រទេសឥណ្ឌា ចាប់ពីថ្ងៃទី១ ខែកក្កដា ឆ្នាំ​២០២៦ ដើម្បីជួប​ពិភាក្សាជាមួយនាយករដ្ឋមន្ត្រី លោក​ Narendra Modi ដោយ​ផ្តោតលើការជំរុញពាណិជ្ជកម្ម ការវិនិយោគ និងកិច្ចសហប្រតិបត្តិការជាយុទ្ធសាស្ត្រ រវាងដៃគូអាស៊ីទាំង២។

ការ​ធ្វើ​ដំណើរនេះកើត​ឡើងបន្ទាប់ពីមាន​ដំណើរទស្សនកិច្ចរបស់លោក Modi នៅ​ទីក្រុងតូក្យូ ក្នុងឆ្នាំ២០២៥ នៅពេលដែលប្រទេសជប៉ុនបានសន្យាថា នឹងបង្កើនការវិនិយោគរបស់ខ្លួនទ្វេដង នៅឥណ្ឌា ឲ្យ​ដល់ជាង ៦១ពាន់លានដុល្លារ ក្នុងរយៈពេល ១ទសវត្សរ៍ខាងមុខ ដោយបានបញ្ជាក់ពីការ​ធ្វើ​ឲ្យ​ទំនាក់​ទំនង​សេដ្ឋកិច្ចកាន់តែស៊ីជម្រៅ។

ជាមួយ​គ្នា​នេះ មេដឹកនាំទាំង២ នឹងរៀបចំកិច្ចប្រជុំកំពូលប្រចាំឆ្នាំលើកទី១៦ រវាងឥណ្ឌា និងជប៉ុន ជាយន្តការមួយដែលនាយករដ្ឋមន្ត្រីនៃប្រទេសទាំង២ ជួបប្រជុំ​ដោយ​ឆ្លាស់គ្នា ពោល​គឺប្ដូរគ្នា​​រៀប​ចំនៅក្នុង​ប្រទេស​របស់ខ្លួន​​។

កិច្ចប្រជុំកំពូលនេះ នឹងពិនិត្យមើលវឌ្ឍនភាព នៅទូទាំងពាណិជ្ជកម្ម បច្ចេកវិទ្យា ហេដ្ឋារចនាសម្ព័ន្ធ ការពារជាតិ និងទំនាក់ទំនង រវាងប្រជាជន និងប្រជាជន ខណៈពេលដែលក៏ដោះស្រាយបញ្ហា ក្នុងតំបន់ និងសកលផងដែរ។ នេះបើយោងតាមសេចក្តីថ្លែងការណ៍របស់ក្រសួងការបរទេសជប៉ុន។

ប្រភពមួយ​រូប​ពី​ឥណ្ឌា បានឱ្យ​ដឹង​ថា លោក Modi និងលោកស្រី​ Takaichi ក៏នឹងចូលរួមព្រឹត្តិការណ៍អាជីវកម្មជាមួយនាយកប្រតិបត្តិមកពីប្រទេសទាំង២ ផងដែរ។ ហើយ​មេដឹកនាំទាំង២ ក៏ត្រូវបានគេរំពឹងថា នឹងពិភាក្សា អំពីកិច្ចសហប្រតិបត្តិការសន្តិសុខ និងកិច្ចប្រឹងប្រែង ដើម្បីជំរុញតំបន់​ឥណ្ឌូ-ប៉ាស៊ីហ្វិក ដែល​សេរី និងបើកចំហ៕