ក្រសួងការបរទេសអ៊ីរ៉ង់បានប្រាប់​ឱ្យ​ដឹង​ថា ប្រទេស​អ៊ីរ៉ង់នឹងធ្វើកិច្ចចរចាជាមួយអន្តរការី​កាតា នៅថ្ងៃពុធ(ទី១ ខែកក្កដា ឆ្នាំ២០២៦) ទាក់ទងនឹងទ្រព្យសម្បត្តិបង្កករបស់ខ្លួន តែ​បដិសេធថា មិន​មាន​កិច្ចប្រជុំណាមួយជាមួយសហរដ្ឋអាមេរិកត្រូវបានគ្រោងទុកនៅក្នុងរដ្ឋឈូងសមុទ្រឡើយ​​ ជាកន្លែងដែលគណៈប្រតិភូមកពីភាគីទាំង២ ត្រូវបានគេរំពឹងទុកថា នឹង​មាន​វត្តមាន​នៅទី​នោះ​។

នៅឯ​សន្និសីទសារព័ត៌មានប្រចាំសប្តាហ៍ អ្នកនាំពាក្យក្រសួងការបរទេស លោក Esmaeil Baghaei បានប្រាប់អ្នកសារ​ព័ត៌មាន​ថា៖ «អ្វីដែលត្រូវបានគេរំពឹងថា នឹងកើតឡើងនៅទីក្រុងដូហា ប្រហែលជាថ្ងៃស្អែក នឹងជាការពិភាក្សា ទាក់ទងនឹងការអនុវត្តបទប្បញ្ញត្តិនៃអនុស្សរណៈនៃការយោគយល់គ្នា (MOU) រួមទាំងបទប្បញ្ញត្តិទាក់ទងនឹងការបញ្ចេញ​ទ្រព្យសម្បត្តិបង្កក​របស់អ៊ីរ៉ង់ ហើយការពិភាក្សាទាំងនេះ នឹងត្រូវធ្វើឡើងជាមួយភាគីកាតា»។

លោក Baghaei កំពុងសំដៅទៅលើមូលនិធិរបស់អ៊ីរ៉ង់ដែលត្រូវបានរារាំង នៅបរទេស ដោយសារតែទណ្ឌកម្មរបស់សហរដ្ឋអាមេរិក ដោយ​នេះ​គឺ​​ជាបញ្ហាសំខាន់មួយ ក្នុងដំណើរ​ការ​ចរចា ពោល​គឺជាផ្នែកមួយនៃកិច្ចព្រមព្រៀង រវាងទីក្រុងតេអេរ៉ង់ និងទីក្រុងវ៉ាស៊ីនតោន ដើម្បីបញ្ចប់សង្គ្រាម នៅ​តំបន់​មជ្ឈិមបូព៌ា។

អ៊ីរ៉ង់កំពុងធ្វើកិច្ចព្រមព្រៀងណាមួយជាមួយសហរដ្ឋអាមេរិក ដោយមានលក្ខខណ្ឌលើការបញ្ចេញ​ផ្នែកនៃទ្រព្យសម្បត្តិទាំងនេះ ដើម្បីនាំមកនូវការបញ្ចប់ជម្លោះយូរអង្វែង។

ក្នុងចំណោមលក្ខខណ្ឌ​ដែលបានព្រមព្រៀងគ្នា ក្រោម MOU ដែលបានចុះហត្ថលេខារួចហើយ គឺជាការប្តេជ្ញាចិត្តរបស់សហរដ្ឋអាមេរិក ក្នុងការ «បញ្ចប់ទណ្ឌកម្មគ្រប់យ៉ាង​ប្រឆាំងនឹងទីក្រុងតេអេរ៉ង់ និង «ធ្វើឱ្យមូលនិធិ និងទ្រព្យសម្បត្តិដែលត្រូវបានបង្កក ឬរឹតបន្តឹង​» របស់អ៊ីរ៉ង់ អាចប្រើប្រាស់បានទាំង​ស្រុង​៕