មេដឹកនាំកូរ៉េខាងជើង លោកគីម ជុងអ៊ុន (Kim Jong Un ) បានសន្យាថានឹងបន្តពង្រឹងចំណងមិត្តភាពជាមួយប្រទេសចិន និងបានហៅកិច្ចប្រជុំកំពូលថ្មីៗនេះជាមួយប្រធានាធិបតីចិន លោកស៊ី ជីនពីង (Xi Jinping) ថាជា «ឱកាសប្រវត្តិសាស្ត្រ» ក្នុងការជំរុញទំនាក់ទំនងជាមួយប្រទេសជិតខាងដ៏ធំរបស់លោក។

នៅក្នុងសារអបអរសាទរមួយផ្ញើទៅកាន់លោកស៊ី ក្នុងឱកាសខួបលើកទី ១០៥ នៃការបង្កើតបក្សកុម្មុយនិស្តចិន លោកគីម បាននិយាយថា ជំហររបស់ទីក្រុងព្យុងយ៉ាងគឺដើម្បីអភិវឌ្ឍទំនាក់ទំនងជាមួយទីក្រុងប៉េកាំងជាលំដាប់ នេះបើយោងតាមរបាយការណ៍របស់ទីភ្នាក់ងារសារព័ត៌មានកណ្តាលកូរ៉េ (KCNA) គ្រប់គ្រងដោយរដ្ឋនៅថ្ងៃពុធ១កក្កដានេះ។

លោកគីម បាននិយាយក្នុងសារនោះថា វាគឺជាជំហរដ៏រឹងមាំរបស់គណបក្ស និងរដ្ឋាភិបាលរបស់ពួកលោកក្នុងការអភិវឌ្ឍទំនាក់ទំនងមិត្តភាពរវាងកូរ៉េខាងជើង និងចិន ដោយមានឫសគល់យូរអង្វែង និងប្រវត្តិសាស្ត្រ និងសង្គមនិយមជាស្នូលរបស់ទំនាក់ទំនងទាំងនោះ។

លោកគីម បាននិយាយថា «កិច្ចប្រជុំកំពូលទីក្រុងព្យុងយ៉ាងថ្មីៗនេះ គឺជាឱកាសប្រវត្តិសាស្ត្រមួយ នៃការពង្រឹងមិត្តភាព និងការជឿទុកចិត្តគ្នារវាងប្រទេសទាំងពីរ» ដោយបន្ថែមថា មេដឹកនាំទាំងពីរបានបញ្ជាក់ជាថ្មីនូវ «ឆន្ទៈដ៏រឹងមាំ» របស់ខ្លួន ដើម្បីជំរុញទំនាក់ទំនងទ្វេភាគី។

យោងតាមទីភ្នាក់ងារសារព័ត៌មាន Yonhap ផ្លូវការរបស់កូរ៉េខាងត្បូង ដំណើរទស្សនកិច្ចរបស់លោក ស៊ី ជីនពីង ទៅកាន់ទីក្រុងព្យុងយ៉ាង នៅថ្ងៃទី៨ និងទី៩ ខែមិថុនា កន្លងទៅថ្មីៗនេះ គឺជាដំណើរទស្សនកិច្ចលើកដំបូងរបស់លោកទៅកាន់ប្រទេសកូរ៉េខាងជើង ក្នុងរយៈពេលជិតប្រាំពីរឆ្នាំ៕