ហុងគ្រី និងប្រទេសជិតខាងស្លូវ៉ាគី បានកត់ត្រាកំណត់ត្រាសីតុណ្ហភាពថ្មីកាលពីថ្ងៃអង្គារ៣០មិថុនាសប្ដាហ៍នេះ ខណៈរលកកម្ដៅធ្ងន់ធ្ងរបានគ្របដណ្ដប់ពាសពេញអឺរ៉ុបកណ្តាល។

ប្រទេសបារាំងបានកត់ត្រា ការស្លាប់យ៉ាងហោចណាស់១.០០០នាក់ ពាក់ព័ន្ធនឹងកម្ដៅចាប់ពីថ្ងៃពុធដល់ថ្ងៃអាទិត្យសប្ដាហ៍មុន។នៅក្នុងការបង្ហោះមួយនៅលើបណ្ដាញសង្គម X ប្រមុខអង្គការសុខភាពពិភពលោក គឺលោក Tedros Adhanom Ghebreyesus បាននិយាយថា ការស្លាប់ជាង១.៣០០ នាក់ត្រូវបានកត់ត្រាចាប់តាំងពីថ្ងៃទី ២១ ខែមិថុនា ដែលជាប់ទាក់ទងនឹងសីតុណ្ហភាពខ្ពស់នៅអឺរ៉ុប។

យោងតាមសេវាអាកាសធាតុរបស់ស្លូវ៉ាគី ប្រទេសនេះបានកត់ត្រាកំណត់ត្រាខ្ពស់បំផុតថ្មីគឺ៤១,៣ អង្សាសេ លើសពីកំណត់ត្រាខ្ពស់បំផុតមុន ៤១ អង្សាសេ ដែលកំណត់ត្រឹមតែមួយថ្ងៃមុន។ កំណត់ត្រាថ្មីនេះត្រូវបានវាស់ស្ទង់នៅទីក្រុង Kamenica nad Hronom នៅភាគខាងត្បូងស្លូវ៉ាគី ជិតព្រំដែនហុងគ្រី។

សេវាអាកាសធាតុជាតិហុងគ្រី HungaroMet បាននិយាយនៅក្នុងវីដេអូលើបណ្ដាញសង្គមហ្វេសប៊ុកថា នៅទូទាំងព្រំដែន សីតុណ្ហភាពបានឡើងដល់៤២ អង្សាសេ នៅទីប្រជុំជន Szecseny ដោយលើសពីកំណត់ត្រាមុន ៤១,៩អង្សាសេ ពីឆ្នាំ២០០៧ ។

ការរឹតបន្តឹងលើការប្រើប្រាស់ទឹកត្រូវបានអនុវត្តលើក្រុងមួយចំនួននៅក្នុងប្រទេសទាំងពីរ ដែលស្ថិតនៅកម្រិតជូនដំណឹងអំពីកម្ដៅខ្ពស់បំផុតអស់រយៈពេលជាច្រើនថ្ងៃមកហើយ។

កន្លែងជាច្រើន រួមទាំងទីក្រុងនីត្រា (Nitra)ភាគកណ្តាល កំពុងប្រឈមនឹងការកង្វះទឹកស្អាត ដោយរថយន្តដឹកទឹក ត្រូវបានដឹកជញ្ជូនផ្គត់ផ្គង់ទឹកដល់ប្រជាជន។

នៅក្នុងភូមិមួយរបស់ប្រទេសហុងគ្រី ដែលមានភ្នំខ្ពស់នៅភាគពាយ័ព្យនៃរដ្ឋធានី ប៊ុយដាប៉ែស ប្រជាជនបានយកធុងជ័រ និងដបមកចាក់ទឹកនៅរទេះទឹកតាមដងផ្លូវ ក្នុងពេលកម្ដៅដ៏ក្តៅគគុក ៤១អង្សាសេ ខណៈម៉ាស៊ីនទឹកបានរីងស្ងួត។

នាយករដ្ឋមន្ត្រីហុងគ្រី លោក Peter Magyar បានជំរុញឱ្យប្រជាជនប្រើប្រាស់ទឹកក្នុងកម្រិតមធ្យម និងជៀសវាងការប្រើប្រាស់ដែលមិនចាំបាច់ ដូចជាការស្រោចទឹកស្មៅ និងលាងរថយន្តជាដើម៕