​​ជិះ​កង់​៖ មិត្ត​ភក្តិ​អា​ហ្ស​ង់​ទីន​បួន​នាក់​នឹង​ជិះ​កង់​ចម្ងាយ ១០,៥០០គីឡូម៉ែត្រ​ពី​ប្រទេស​អាហ្វ្រិក​ខាងត្បូង​ទៅកាន់​ប្រទេស​កាតា ​ដើម្បី​គាំទ្រ​ប្រទេស​របស់​ពួកគេ​ក្នុង​ព្រឹត្តិការណ៍ World Cup ២០២២ ក្នុង​ខែវិច្ឆិកា​។

Lucas Ledezma, Leandro Blanco Pighi, Silvio Gatti និង Sebastian Rodriguez ដែល​មកពី​ទីក្រុង Cordoba ប្រទេស​អា​ហ្ស​ង់​ទីននឹង​ចាប់ផ្តើម​ជិះ​កង់​នៅ​ថ្ងៃទី១៥ ខែឧសភា​ខាងមុខ​ចេញពី​រដ្ឋធានី Cape Town ប្រទេសអាហ្វ្រិកខាងត្បូង​ទៅកាន​ទីក្រុង​ដូ​ហា​ប្រទេស​កាតា ដែល​នឹងត្រូវ​ឆ្លងកាត់ ១៥ប្រទេស ២ទ្វីប​។ ​ក្រុម​ជំរើសជាតិ​អា​ហ្ស​ង់​ទីន​នឹង​ចាប់ផ្តើម​ប្រកួត​ដំបូង​នៅ World Cup លើទឹក​ដីកា​តា​នៅ​ថ្ងៃទី២២ ខែវិច្ឆិកា​ជួប​ជាមួយ​អារ៉ាប៊ីសាអ៊ូឌីត​នៅ​កីឡដ្ឋាន Lusail​។​ ​លោក Lucas Ledezma ក៏​ធ្លាប់ធ្វើ​រឿង​បែប​នេះដែរ​ក្នុងការ​ជិះ​កង់​ទៅ​ទស្សនា​ព្រឹត្តិការណ៍ World Cup កន្លង​មក​នៅ​ប្រទេស​ប្រេ​ស៊ី​ល​ឆ្នាំ២០១៤ និង​រុស្ស៊ី​ឆ្នាំ២០១៨ ក៏ដូចជា​ជិះ​កង់​ទៅ​ទស្សនា​ព្រឹត្តិការណ៍​អូឡាំពិក​ឆ្នាំ២០១៨ នៅ​ទីក្រុង Rio de Janeiro ប្រទេស​ប្រេ​ស៊ី​ល និង​ព្រឹត្តិការណ៍​បាល់ទាត់​ជើងឯក​អាមេរិក​ខាងត្បូង Copa America ឆ្នាំ២០១៥ នៅ​ប្រទេស​ស៊ី​លី​។

​សម្រាប់​ដំណើរ​ផ្សងព្រេង​ក្នុង​ឆ្នាំ២០២២ នេះ​លោក Ledezma នឹង​រួម​ដំណើរ​ជាមួយ​អ្នក​ចងក្រង​ឯកសារ​ម្នាក់ អ្នកនិពន្ធ និងភ្នាក់ងារ​ទេសចរ​ម្នាក់​។ ​ក្រៅពី​ទស្សនា​ការប្រកួត ដំណើរ​កម្សាន្ត​នេះ​មាន​គោលបំណង​ជួយ​បរិស្ថាន​។ រាល់​គីឡូម៉ែត្រ​ដែល​បានធ្វើ​ដំណើរ ​នឹង​ត្រូវបាន​សម្គាល់​ដោយ​ការដាំ​ដើមឈើ​នៅលើ​ភ្នំ Cordoba ដែលមាន​ចម្ងាយ​ប្រហែល ៦០០គីឡូម៉ែត្រ​ភាគ​ពាយព្យ​នៃ​រដ្ឋធានី Buenos Aires របស់​ប្រទេស​អា​ហ្ស​ង់​ទីន​៕

​អត្ថបទ​៖​នាង សុភា​វុ​ធ