ភ្នំពេញ ៖ ខណៈដែលកម្ពុជាកំពុងជួបប្រឈមព្រឹត្តិការណ៍សហគមន៍២០កុម្ភៈ ហើយមានករណីឆ្លងថ្មីកូវីដ១៩ រៀងរាល់ថ្ងៃនោះ ជំងឺនេះ ឆ្លងមិនរើសមុខ ក្មេង ចាស់ ប្រុសស្រី ឬ ជាតិសាសន៍ណានោះទេ ជាក់ស្តែងនៅយប់ថ្ងៃទី១៩ ខែមីនាម្សិលមិញ ក្រុមការងារសុខាភិបាល បានទៅទទួលកុមារាអាយុ៦ឆ្នាំ នៅភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ បានឆ្លងមេរោគកូវីដ១៩ពីម្តាយ។
តាមរយៈរូបភាព និង វីដេអូ ខ្លីប៉ុន្មានវិនាទី ដែលបង្ហាញពីភាពក្លាហាន និងរឹងមាំរបស់ក្មេងប្រុសតូច ស្ពាយកាតាបពីក្រោយ និង យួរថង់មួយនៅដៃ ដើរចូលរថយន្តពេទ្យ ដោយមិនមានយំ ឬ ប្រកែកនោះឡើយ ធ្វើអោយមហាជនរំជួលចិត្ត ខ្លះស្រក់ទឹកភ្នែក ចែករំលែករូបភាព និងវីដេអូ ភ្ជាប់ការសរសេរសារខ្លីៗជាច្រើន លើកទឹកចិត្តក្មេងតូចម្នាក់នេះ និង ជូរពរអោយឆាប់បានជាសះស្បើយ។ អ្នកលេងបណ្តាញសង្គម ជាពិសេសហ្វេសប៊ុកជាដើម មានខ្លះបានធ្វើជារូបភាពបែបគំនូរពីកុមារាអាយុ៦ឆ្នាំនេះ បង្ហាញពីការជំរុញទឹកចិត្ត ក្លាហាន ដើម្បីជំនះស្ថានភាពឆ្លងជំងឺកូវីដ១៩ នេះផងដែរ ។
លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានលើកឡើងថា វីរុសកូវីដ-១៩ កំពុងតែវ៉ៃលុកយើងហើយ សូម្បីតែកុមារអាយុ ៦ឆ្នាំក៏វាមិនលើកលែងឱ្យដែរ។ បញ្ហាសំខាន់របស់បុគ្គលគ្រប់រូបដែលជាមនុស្សពេញវ័យនៅពេលនេះ គ្មានអ្វីដែលល្អប្រសើរជាងការនៅផ្ទះ កុំចេញក្រៅផ្ទះ បើមិនចាំបាច់ បើចាំបាច់ត្រូវចេញ សុំអនុវត្តន៍វិធានការ ៣ការពារ និង ៣កុំ ដែលបានដាក់ចេញដោយសម្តេចតេជោ នាយករដ្ឋមន្ត្រី ឱ្យអនុវត្តន៍ទាំងអស់គ្នា ឱ្យបានម៉ឺងម៉ាត់ជាទីបំផុត ។
សូមបញ្ជាក់ថា កុមារា អាយុ ៦ឆ្នាំដែលទទួលលទ្ធផលតេស្តវិជ្ជមានកូវីដ-១៩ ឆ្លងពីម្តាយអាយុ ៣១ ឆ្នាំ ត្រូវបានរដ្ឋបាលរាជធានីភ្នំពេញ និងមន្ទីរសុខាភិបាលរាជធានីភ្នំពេញ បញ្ជូនដាក់អោយសម្រាកព្យាបាលនៅសណ្ឋាគារក្រេតឌុក និងបានជួបជុំជាមួយម្តាយដែលកំពុងសម្រាកព្យាបាលជំងឺកូវីដ-១៩ នៅទីនោះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
