រុស្ស៊ី៖ កងទ័ពរុស្ស៊ីកំពុងផ្ដោតកិច្ចប្រឹងប្រែងរបស់ពួកគេ លើការដណ្តើមយកការគ្រប់គ្រងនៅតំបន់ភាគខាងកើតអ៊ុយក្រែន នៅមុនខួបទិវាជ័យជំនះរបស់អតីតសហភាពសូវៀតលើរបបណាស៊ីអាល្លឺម៉ង់។ ប៉ុន្តែកងកម្លាំងរុស្ស៊ីកំពុងតស៊ូក្នុងពេលមានការទប់ទល់ពីកងកម្លាំងអ៊ុយក្រែន។
ក្រសួងការពារជាតិរុស្ស៊ីនិយាយកាលពីថ្ងៃព្រហស្បតិ៍ថា កងកម្លាំងរបស់ខ្លួនបានអនុវត្តការវាយប្រហារដោយមីស៊ីលលើទីតាំងយោធាអ៊ុយក្រែន និងបានបាញ់ទម្លាក់យានដ្រូននៅតំបន់ភាគខាងកើតទីក្រុង Kharkiv តំបន់ Donetsk និង Luhansk និងនៅក្នុងទីក្រុង Kherson ភាគខាងត្បូង។ ជាមួយគ្នានេះទីភ្នាក់ងារព័ត៌មាន Interfax របស់រុស្ស៊ីកាលពីថ្ងៃព្រហស្បតិ៍បានដកស្រង់សំដី មេដឹកនាំម្នាក់របស់ក្រុមសកម្មប្រយុទ្ធគាំទ្ររុស្ស៊ីក្នុងតំបន់ Donetsk ដែលនិយាយថា ក្បួនព្យុហយាត្រាដើម្បីប្រារព្ធខួបជ័យជំនះរបស់សហភាពសូវៀត ក្នុងសង្គ្រាមលោកលើកទី២ នៅថ្ងៃទី៩ ខែឧសភា នឹងមិនត្រូវបានធ្វើឡើងនៅថ្ងៃនោះទេ។
តាមសេចក្ដីរាយការណ៍បានឲ្យដឹងថា ព្យុហយាត្រានឹងធ្វើឡើង បន្ទាប់ពីកងកម្លាំងរុស្ស៊ីទទួលបានការគ្រប់គ្រងពេញ លេញលើតំបន់នេះ និងបាននិយាយថា ការគ្រប់គ្រងតំបន់ Donetsk នៅត្រឹមថ្ងៃទី៩ ខែឧសភាមិនទំនងជាអាចធ្វើទៅបានឡើយ។ ប្រព័ន្ធផ្សព្វផ្សាយ Online ឯករាជ្យរបស់រុស្ស៊ី Meduza បានដកស្រង់ប្រភពជាច្រើនដែលជិតស្និតជាមួយវិមានក្រឹមឡាំងថា ការបោះឆ្នោតប្រជាមតិលើការចូលរួមជាមួយសហព័ន្ធរុស្ស៊ី អាចត្រូវបានធ្វើឡើងនៅតំបន់ដូចជា Donetsk, Luhansk និងទីក្រុង Kherson នៅថ្ងៃទី១៤ និងទី១៥ ខែឧសភា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
