រថយន្តជាច្រើនជួរកំពុងរង់ចាំចាក់ប្រេងនៅតាមស្ថានីយប្រេងឥន្ធនៈនៅក្នុងប្រទេសរុស្ស៊ី ហើយការខកចិត្ត និងភាពមិនប្រាកដប្រជាក៏ដូចគ្នាដែរ ខណៈដែលការវាយប្រហាររបស់អ៊ុយក្រែនជាច្រើនខែ បានបណ្តាលឲ្យអគ្គិភ័យឆេះរោងចក្រចម្រាញ់ប្រេង និងធ្វើឲ្យរាំងស្ទះដល់ការផ្គត់ផ្គង់សម្រាប់អ្នកបើកបរនៅ ទូទាំងប្រទេសដ៏ធំនេះ។

ការកំណត់កម្រិតប្រេងឥន្ធនៈ ត្រូវបានណែនាំនៅក្នុងតំបន់ជាច្រើន ដោយមានរថយន្តតម្រង់ជួររាប់ម៉ោង នៅតាមដងផ្លូវដើម្បីរង់ចាំចាក់សាំង។ វីដេអូប្រព័ន្ធផ្សព្វផ្សាយសង្គមបង្ហាញពីអ្នកបើកបរមានការព្រួយបារម្ភខ្លាចអត់មានប្រេងចាក់ និងតម្លៃប្រេងកើនឡើងខ្លាំង។ អភិបាលក្រុង Irkutsk ថែមទាំងបានបញ្ជាឲ្យ យកបង្គន់ចល័តមកដាក់នៅតាមកន្លែងដែលមានរថយន្តកំពុងតម្រង់ជួរគ្នារង់ចាំចាក់ប្រេងទាំងនោះ។

វិបត្តិប្រេងឥន្ធនៈ ដែលមិនធ្លាប់មានពីមុនមកសម្រាប់ប្រទេសមួយដែលជាអ្នកផលិតថាមពលធំជាងគេបំផុតមួយរបស់ពិភពលោក គឺជាលទ្ធផលនៃការឈ្លានពានរបស់ទ្រង់ទ្រាយធំរបស់ទីក្រុងមូស្គូលើអ៊ុយ ក្រែន ដែលបច្ចុប្បន្នស្ថិតក្នុងឆ្នាំទី៥របស់ខ្លួន។

វិបត្តិនេះនាំឲ្យមានការទទួលស្គាល់ដ៏កម្រមួយពីលោកប្រធានាធិបតី វ្ល៉ាឌីមៀ ពូទីន ដែលបានបញ្ជាក់ថា «បញ្ហានៅតែបន្តកើតមានសម្រាប់ទាំងអ្នកបើកបរ និងអាជីវកម្ម» និង «នៅតែមានរថយន្តបន្តរង់ចំានៅតាមស្ថានីយប្រេងឥន្ធនៈដើម្បីចាក់ប្រេង ហើយការស្វែងរកកម្រិតប្រេងឥន្ធនៈត្រឹមត្រូវ តែងតែមិនងាយស្រួលនោះទេ»៕