នាថ្ងៃពុធ (ទី១ ខែកក្កដា ឆ្នាំ២០២៦) នេះ​ ក្នុងអំឡុងពេលប្រារព្ធខួបលើកទី១០៥ នៃការបង្កើតគណបក្សកុម្មុយនីស្តចិន លោកប្រធានាធិបតី Xi Jinping បានមានប្រសាសន៍ថា គណបក្សកុម្មុយនីស្តចិនដែល​កំពុងកាន់អំណាច ត្រូវតែតាមឲ្យ​ទាន់កាលៈទេសៈដែលកំពុងផ្លាស់ប្តូរ ខណៈពេលដែលការពារវឌ្ឍនភាពដែលខ្លួនសម្រេចបាន​។

លោក Xi មិនបានកំណត់អត្តសញ្ញាណឱកាស ឬហានិភ័យជាក់លាក់ណាមួយឡើយ​ នៅក្នុងសុន្ទរកថារយៈពេល ៤០​នាទីរបស់លោក នៅឯមហាសាលប្រជាជនចិន​របស់​ទីក្រុងប៉េកាំង ប៉ុន្តែអ្នកវិភាគ លើក​ឡើង​ថា កំណើនសេដ្ឋកិច្ចយឺត និងការធ្លាក់ចុះប្រជាសាស្ត្រ បង្កជា​បញ្ហាប្រឈមធំ សម្រាប់ប្រទេស​មាន​សេដ្ឋកិច្ចធំបំផុត​ទី២ របស់ពិភពលោកមួយ​នេះ​។

លោក Xi ដែលជាមេដឹកនាំដ៏មានឥទ្ធិពលបំផុតរបស់ប្រទេស គិត​ចាប់តាំងពីលោក ម៉ៅ សេទុង (Mao Zedong) បានបន្ថែម​ថា «ការអភិវឌ្ឍរបស់ប្រទេសចិនបច្ចុប្បន្ន ស្ថិតនៅក្នុងដំណាក់កាលមួយដែលឱកាសជាយុទ្ធសាស្ត្រ មាន​ទាំង​ហានិភ័យ និងបញ្ហាប្រឈម​រួម​ជាមួយគ្នា»។ លោកបានអំពាវនាវឱ្យគណបក្សសម្របសម្រួលឱ្យកាន់តែប្រសើរឡើង ដើម្បីដោះស្រាយបញ្ហា ទាំង​ក្នុងស្រុក និងអន្តរជាតិ។

ដោយជួប​​បញ្ហាប្រឈមខាងក្រៅ រាប់​ចាប់ពីការទប់ស្កាត់បច្ចេកវិទ្យាកម្រិត​ខ្ពស់​ដែលដឹកនាំដោយលោកខាងលិច រហូតដល់ទំនាក់ទំនងពាណិជ្ជកម្មដ៏ច្របូកច្របល់ ជាមួយសហរដ្ឋអាមេរិក និងភាពតានតឹង ជុំវិញ​កោះតៃវ៉ាន់ ថ្នាក់​ដឹកនាំគណបក្ស ចាត់ទុកថា វាគឺ​ជាកិច្ចការសំខាន់មួយ ដែល​ត្រូវ​ពង្រឹងការយល់ដឹងរបស់ពួកគេ លើគ្រប់ទិដ្ឋភាពទាំងអស់នៃសង្គមចិន។

គួរ​បញ្ជាក់ថា ដោយ​ត្រូវបានបង្កើតឡើងដោយអ្នកបដិវត្តន៍ចិនរាប់​សិបនាក់ ​ក្នុងឆ្នាំ១៩២១ ខណៈ​គណបក្សកុម្មុយនីស្តចិន ឥឡូវនេះមានសមាជិកជាង ១០០លាននាក់ ឬ ៧,២ភាគរយនៃចំនួនប្រជាជនចិន៕