ប្រធានាធិបតីចិន លោក Xi Jinping នៅ​ថ្ងៃពុធ (ទី​១ ខែកក្កដា ឆ្នាំ២០២៦) នេះ​ បានបញ្ជាក់ជាថ្មីនូវការប្តេជ្ញាចិត្ត «ឥត​ប្រែប្រួល​» របស់ទីក្រុងប៉េកាំង ក្នុងការ «ដោះស្រាយបញ្ហាកោះ​តៃវ៉ាន់»។

ដោយ​ត្រូវបានដកស្រង់សម្តីដោយសារព័ត៌មាន Xinhua ដែលមានមូលដ្ឋាននៅទីក្រុងប៉េកាំង ខណៈពេលដែលលោកបានថ្លែងនៅក្នុងពិធី ដើម្បីអបអរសាទរខួបលើកទី១០៥ នៃការបង្កើតគណបក្ស លោក Xi បាន​មាន​ប្រសាសន៍​ថា៖ «ការដោះស្រាយបញ្ហាកោះ​តៃវ៉ាន់ និងការសម្រេចបាននូវការបង្រួបបង្រួមពេញលេញរបស់ប្រទេសចិន គឺជាបេសកកម្មប្រវត្តិសាស្ត្រ និងជាការប្តេជ្ញាចិត្តឥត​ប្រែប្រួល​ សម្រាប់គណបក្សកុម្មុយនីស្តចិន (CPC)»។

លោក Xi ដែលជាអគ្គលេខាធិការនៃគណៈកម្មាធិការមជ្ឈិម​បក្ស​ បានសន្យាថា នឹងចាត់វិធានការ «យ៉ាងម៉ឺងម៉ាត់» ដើម្បីប្រយុទ្ធប្រឆាំងនឹងក្រុមបំបែកខ្លួន ដែលស្វែងរក «ឯករាជ្យឲ្យ​កោះ​តៃវ៉ាន់» ទប់​ទល់​នឹង​ការជ្រៀតជ្រែកពីខាងក្រៅ និងជំរុញការបង្រួបបង្រួមជាតិ។

ប្រទេសចិនចាត់ទុកកោះ​តៃវ៉ាន់ជាខេត្ត «បំបែកខ្លួន» ខណៈដែលទីក្រុងតៃប៉ិ ទទូចពី​ឯករាជ្យរបស់ខ្លួន។ ដោយអំពាវនាវឱ្យមានកិច្ចប្រឹងប្រែង ដើម្បីការពារអធិបតេយ្យភាព សន្តិសុខ និងផលប្រយោជន៍អភិវឌ្ឍន៍របស់ប្រទេសចិន «យ៉ាងម៉ឺងម៉ាត់» លោកបានសង្កត់ធ្ងន់លើការគាំទ្រភាពជាអ្នកដឹកនាំដាច់ខាតរបស់​បក្ស​ ​លើកងកម្លាំងប្រដាប់អាវុធប្រជាជន៕