យោងតាមមន្ត្រីជាន់ខ្ពស់មួយ​រូប បាន​ឲ្យ​ដឹង​ថា អ្នកចរចាអាមេរិក លោក​ Jared Kushner និងលោក Steve Witkoff មាននូវ​ការពិភាក្សាដ៏​វិជ្ជមានជាមួយមេដឹកនាំតំបន់ នៅប្រទេស​កាតា ហើយការពិភាក្សាបច្ចេកទេសជាមួយអ៊ីរ៉ង់ កំពុងដំណើរការទៅមុខ ខណៈដែលប្រទេសទាំង២ កំពុងព្យាយាមបន្ធូរបន្ថយភាពតានតឹងបន្ទាប់ពីការវាយប្រហារថ្មីៗនេះ បានធ្វើឱ្យបទឈប់បាញ់ដែលផុយស្រួយរួចទៅហើយប្រឈម​ហានិភ័យ​។

លោក Witkoff និង​លោក​ Kushner បាននិង​កំពុង​ស្ថិត​នៅ​ឯ​​ទីក្រុងដូហា ជាផ្នែកនៃការចរចាដោយប្រយោលដែលកំពុងបន្ត រវាងសហរដ្ឋអាមេរិក និងអ៊ីរ៉ង់ ជាដំណើរការ​ដែល​មានបំណងបង្កើតកិច្ចព្រមព្រៀងសន្តិភាពរយៈពេលវែង។ កិច្ចព្រមព្រៀងបណ្តោះអាសន្នដែលបានចុះហត្ថលេខាកាលពីដើមខែនេះ បានបើកឱកាស​ឲ្យមាន​រយៈពេលចរចា ៦០​ថ្ងៃ ប៉ុន្តែកិច្ចប្រឹងប្រែងទាំងនោះ បានប្រឈមនឹង​ដំណើរ​ថយក្រោយ ក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីមាន​ការប៉ះទង្គិចគ្នាជាបន្តបន្ទាប់ នៅ​ច្រកសមុទ្រ Hormuz។

អ្នក​ទាំង​២ បានត្រឡប់ទៅទីក្រុងដូហាវិញ សម្រាប់ការពិភាក្សានេះ បន្ទាប់ពីសហរដ្ឋអាមេរិក និងអ៊ីរ៉ង់បានយល់ព្រមបញ្ឈប់ការវាយប្រហារ​ថ្មី​របស់ភាគីទាំង​២។ តែ​យ៉ាងណាក្ដី​ ភាពមិនប្រាកដប្រជា ដែលអន្ទោល​​លើការពិភាក្សារបស់ប្រទេសទាំង២ បានបង្ហាញពីលក្ខណៈផុយ​ស្រួយ​នៃកិច្ចពិភាក្សា និងផ្លូវស្មុគស្មាញ នៅខាងមុខ សម្រាប់ទាំងទីក្រុងវ៉ាស៊ីនតោន និងតេអេរ៉ង់ ខណៈពេលដែលភាគី​ទាំង២ កំពុងស្វែងរកការសម្របសម្រួលកិច្ចព្រមព្រៀងទូលំទូលាយមួយ។

មន្ត្រីកាតាបាននិយាយ​សម្រាល​កុំ​ឲ្យ​មាន​ការរំពឹងទុកខ្ពស់​ សម្រាប់ការចរចាថ្មី ដោយបញ្ជាក់​ថា បេសកជនជាន់ខ្ពស់​របស់លោក​ប្រធានាធិបតី Donald Trump នឹងមិនជួបដោយផ្ទាល់ជាមួយសមភាគីអ៊ីរ៉ង់របស់ពួកគេទេ។

ដោយដកស្រង់សម្តីមន្ត្រីអាមេរិកដែលបាន​និយាយ​ក្នុង​លក្ខខណ្ឌ​មិនបញ្ចេញឈ្មោះ សារព័ត៌មាន​ Wall Street Journal បានរាយការណ៍កាល​ពី​ល្ងាចថ្ងៃអង្គារ (ទី៣០ ខែមិថុនា ឆ្នាំ២០២៦)ថា លោក Trump បានសម្រេចចិត្តមិនបន្តយុទ្ធនាការយោធាទូលំទូលាយឡើងវិញទេ ហើយបានប្រាប់បុគ្គលិករបស់លោកថា លោកមិនប្រកាន់ទេ ប្រសិនបើការចរចាបានអូសបន្លាយហួសពីថ្ងៃផុតកំណត់ទី១៨​ ខែសីហា៕