កាលពីយប់ថ្ងៃ​អង្គារ​ (ទី៣០ ខែមិថុនា ឆ្នាំ២០២៦) ដោយដកស្រង់សម្តីមន្ត្រីអាមេរិកដែលដឹង​ពី​បញ្ហានេះ សារព័ត៌មាន​ The Wall Street Journal បានរាយការណ៍ថា ប្រធានាធិបតីអាមេរិក លោក Donald Trump កំពុងពិចារណាថា តើត្រូវផ្លាស់ប្តូរងាក​ទៅរកយុទ្ធនាការយោធាទ្រង់ទ្រាយធំប្រឆាំងនឹងអ៊ីរ៉ង់វិញដែរ ឬយ៉ាង​ណា ទោះបីជាលោកអនុញ្ញាតឱ្យការចរចានុយក្លេអ៊ែរបន្តដំណើរការ​ សម្រាប់ពេលនេះក៏ដោយ​។

ក្នុងរយៈពេលប៉ុន្មានថ្ងៃថ្មីៗនេះ លោក Trump បានពិភាក្សាអំពីលទ្ធភាពនៃការវាយប្រហារបន្ថែមទៀតជាមួយរដ្ឋមន្ត្រីក្រសួងការពារជាតិ លោក Pete Hegseth និងនាយ​សេនាធិការចម្រុះ លោក​ឧត្តមសេនីយ៍ Dan Caine។ យោងតាមរបាយការណ៍ បាន​ឲ្យ​ដឹង​ថា ការសន្ទនាបានពិនិត្យមើលថា តើទីក្រុងវ៉ាស៊ីនតោនគួរតែបោះបង់ចោលផ្លូវការទូត ហើយចាប់​ផ្ដើម​ការវាយប្រហារទ្រង់ទ្រាយធំឡើងវិញដែរ ឬយ៉ាង​ណា ជាជំហានមួយដែលមន្ត្រីមួយចំនួន បានពិពណ៌នាថា ជាកិច្ចប្រឹងប្រែង ដើម្បី «បញ្ចប់ការងារទាំង​ស្រុង​»។

យ៉ាង​ណាក្ដី លោក Trump មិនទាន់បានធ្វើការសម្រេចចិត្តចុងក្រោយនៅឡើយទេ។ សម្រាប់ពេលនេះ លោកបានប្រាប់ជំនួយការថា លោកមាន​ឆន្ទៈ​ក្នុងការផ្តល់ពេលវេលាបន្ថែមទៀតដល់ដំណើរការចរចា រួមទាំងអាច​ហួសពីកាល​កំណត់ថ្ងៃទី១៨​ ខែសីហា ដើម្បីទុកឱកាសដែលអាចមាន​​កិច្ចព្រមព្រៀងនុយក្លេអ៊ែរ។

តែ​ក្នុងពេលជាមួយគ្នានេះ លោក​ប្រធានាធិបតីបានផ្តល់សញ្ញាថា លោកអាចនៅតែអនុញ្ញាតឱ្យមានការវាយប្រហារតែ​ម្ដង​ ប្រសិនបើអ៊ីរ៉ង់រំលោភលើអនុស្សរណៈនៃការយោគយល់គ្នា (MOU)៕