កំពង់ឆ្នាំង ៖ មេបញ្ជាការតំបន់ប្រតិបត្តិការសឹករងកំពង់ឆ្នាំង និងប្រជានេសាទក្នុងខេត្តកំពង់ឆ្នាំង នៅថ្ងៃទី០១ ខែកក្កដា នេះ បានអះអាងថា ធនធានត្រីនៅឆ្នាំ២០២៦នេះ មានការកើនឡើងគួរឱ្យកត់សម្គាល់ បន្ទាប់ពីកម្លាំងកងទ័ព សហការជាមួយរដ្ឋបាលជលផល និងសមត្ថកិច្ចពាក់ព័ន្ធ បន្តបើកយុទ្ធនាការបង្ក្រាបបទល្មើសនេសាទខុសច្បាប់យ៉ាងម៉ឺងម៉ាត់ និងជាប់ជាប្រចាំ។

ឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង បានបញ្ជាក់ថា វិធានការបង្ក្រាបបទល្មើសនេសាទដែលសម្តេចធិបតី ហ៊ុន ម៉ាណែត នាយករដ្ឋមន្ត្រី និងអគ្គមេបញ្ជាការកងទ័ពបានអោយកម្លាំងកងទ័ពចុះសហការការបង្ក្រាបបទល្មើសនេសាទគ្រប់ប្រភេទជាមួយកម្លាំងសមត្ថកិច្ចទទួលបានលទ្ធផលល្អ មកដល់ពេលនេះ បានផ្តល់លទ្ធផលជាវិជ្ជមានគួរអោយកត់សម្គាល់ ដែលធ្វើឱ្យធនធានជលផលមានឱកាសបន្តពូជ និងស្តារកំណើនឡើងវិញតាមធម្មជាតិ ខណៈប្រជានេសាទអាចរកបានត្រីច្រើនជាងមុន និងបានជួយលើកកម្ពស់ជីវភាពរស់នៅរបស់ពួកគេឱ្យកាន់តែប្រសើរឡើង​។

ប្រជានេសាទ បានសម្តែងការពេញចិត្តចំពោះការយកចិត្តទុកដាក់របស់ប្រមុខរាជរដ្ឋាភិបាល កម្លាំងកងទ័ព និងសមត្ថកិច្ចគ្រប់ជាន់ថ្នាក់ ដែលបានចាត់វិធានការយ៉ាងតឹងរ៉ឹងលើការប្រើប្រាស់ឧបករណ៍នេសាទខុសច្បាប់ និងការបំផ្លាញធនធានជលផល។ ប្រជានេសាទសប្បាយចិត្តខ្លាំង ក្រោយឃើញត្រីកើនឡើងវិញ និងការនេសាទរបស់ពួកគេបានផលជាទីគាប់ចិត្ត និងអាចបំពេញតម្រូវការផ្សេងក្នុងជីវភាពប្រចាំថ្ងៃ។

ទោះបីការបង្ក្រាបទទួលបានលទ្ធផលគួរជាទីពេញចិត្តក៏ដោយ ក៏កម្លាំងតំបន់ប្រតិបត្តិការសឹករងកំពង់ឆ្នាំង រួមជាមួយរដ្ឋបាលជលផល និងសមត្ថកិច្ចពាក់ព័ន្ធ បានបន្តចុះល្បាត និងអនុវត្តវិធានការច្បាប់ជាប្រចាំ ដើម្បីទប់ស្កាត់ និងឈានទៅលុបបំបាត់បទល្មើសនេសាទខុសច្បាប់ឱ្យមានប្រសិទ្ធភាព សំដៅការពារ និងអភិរក្សធនធានជលផលឱ្យស្ថិតស្ថេរ សម្រាប់ផលប្រយោជន៍ប្រជាពលរដ្ឋ និងមនុស្សជំនាន់ក្រោយ៕

អត្ថបទ៖ កាំង ហុងវាស្នា