នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអង្គារ (ទី៣០ ខែមិថុនា ឆ្នាំ២០២៦) ថា អ៊ីស្រាអែលនឹងវាយប្រហារអ៊ីរ៉ង់ម្តងទៀត «ប្រសិនបើចាំបាច់» ដោយសន្យា​យ៉ាង​ម៉ឺងម៉ាត់​ថា ទីក្រុងតេអេរ៉ង់ «នឹងមិនអាច​មានអាវុធនុយក្លេអ៊ែរ» ជាដាច់ខាត​។

លោក Netanyahu បានអះអាងនៅក្នុងបទសម្ភាសន៍ជាមួយទូរទស្សន៍ Channel 14 របស់អ៊ីស្រាអែលថា៖ «ដោយសារ​ប្រតិបត្តិ​ការ​នៅក្នុងប្រទេសអ៊ីរ៉ង់ យើងបានជួយសង្គ្រោះខ្លួនយើងឲ្យ​រួចពី​​ផុត​ការ​បំផ្លាញ​​ដោយគ្រាប់បែកបរមាណូ»។

ការកត់សម្គាល់របស់លោកបានកើតឡើង ខណៈដែល​​អនុស្សរណៈនៃការយោគយល់គ្នា (MOU) រវាងទីក្រុងវ៉ាស៊ីនតោន និងទីក្រុងតេអេរ៉ង់ ក្រោម​ការ​សម្របសម្រួលដោយ​ប្រទេសប៉ាគីស្ថាន បានចូលជាធរមាននៅថ្ងៃទី១៨​ ខែមិថុនា បន្ទាប់ពីត្រូវបានចុះហត្ថលេខាតាមប្រព័ន្ធអេឡិចត្រូនិកដោយប្រធានាធិបតីអ៊ីរ៉ង់ លោក Masoud Pezeshkian និងប្រធានាធិបតីអាមេរិក លោក Donald Trump។

កិច្ចព្រម​ព្រៀង​​នេះ ផ្តល់នូវក្របខ័ណ្ឌ ដើម្បី​បញ្ចប់ជម្លោះ និងដោះស្រាយបញ្ហាដែលនៅសេសសល់ រវាងទីក្រុងវ៉ាស៊ីនតោន និងតេអេរ៉ង់ តាមរយៈការចរចា រួមទាំងការបញ្ឈប់អរិភាព ការបន្ធូរបន្ថយទណ្ឌកម្ម បញ្ហានុយក្លេអ៊ែរ ការបើកច្រកសមុទ្រ Hormuz ឡើងវិញ និងការរៀបចំសន្តិសុខក្នុងតំបន់កាន់តែទូលំទូលាយ។

យ៉ាង​ណាក្ដី អ៊ីស្រាអែលបានបង្ហាញម្តងហើយម្តងទៀតនូវការជំទាស់របស់ខ្លួន ចំពោះកិច្ចព្រមព្រៀងណាមួយជាមួយទីក្រុងតេអេរ៉ង់ ហើយបានព្រមានអំពីការចាប់ផ្តើមវាយប្រហារឡើងវិញលើអ៊ីរ៉ង់៕