អង្គការសហប្រជាជាតិ (UN) បានឲ្យដឹង​កាលពីថ្ងៃអង្គារ (ទី៣០ ខែមិថុនា ឆ្នាំ២០២៦) ថា មនុស្សរាប់ម៉ឺននាក់ ត្រូវការអាហារ និងជម្រកជាបន្ទាន់ នៅក្នុងប្រទេសវ៉េណេស៊ុយអេឡា បន្ទាប់ពីមាន​នូវ​រញ្ជួយដីដ៏អាក្រក់​បំផុត​ ២លើក ដែលបានសម្លាប់មនុស្សជិត ២.០០០នាក់ ខណៈដែលគ្រូពេទ្យបានព្រមានអំពីការផ្ទុះឡើងនៃជំងឺ ដោយអ្នករស់រានមានជីវិតកំពុងនាំ​គ្នា​សម្រាក​នៅតាមដងផ្លូវ។

គ្រោះរញ្ជួយដីកម្រិត ៧,២ និង ៧,៥រ៉ិចទ័រ កាលពីសប្តាហ៍មុន ដែលជាគ្រោះមហន្តរាយរញ្ជួយដីដ៏អាក្រក់បំផុតមួយ នៅតំបន់​អាមេរិកឡាទីន បានបណ្ដាល​ឲ្យអគារលំនៅឋាន​ទាំងមូលបាក់​ដួល​រលំ​ ធ្វើឱ្យមនុស្សរាប់ម៉ឺននាក់បាត់ខ្លួន និងបានជំរុញឱ្យមានប្រតិបត្តិការស្វែងរក និងជួយសង្គ្រោះយ៉ាងប្រញាប់ប្រញាល់ សម្រាប់អ្នកនៅ​រស់រានមានជីវិតដែលជាប់នៅក្នុងគំនរបាក់បែក។

ទីភ្នាក់ងារជនភៀសខ្លួនរបស់ UN បានឲ្យ​ដឹង​ថា «កង្វះខាតអាហារកំពុងរាលដាល សេវាកម្មជាមូលដ្ឋានត្រូវបានផ្អាកដំណើរការ​ ហើយការតភ្ជាប់ត្រូវបានកាត់ផ្តាច់ជាចម្បង» នៅក្នុងទីក្រុងកំពង់ផែ La Guaira ជា​តំបន់ដែលរងគ្រោះខ្លាំងបំផុត នៅភាគខាងជើងនៃរដ្ឋធានីការ៉ាកាស។

អ្នកលក់ដូរនៅទីក្រុង​ La Guaira ដែលរងរបួសដោយសារធ្លាក់ពីលើម៉ូតូ អំឡុងពេលមាន​រញ្ជួយដី ​ឈ្មោះ Daniela Armas អាយុ ១៨ឆ្នាំ បាននិយាយថា «ពួកគេចែកសម្ភារៈនៅទីនេះ ប៉ុន្តែពេលខ្លះ មនុស្សម្នា​ស្ទើរតែសម្លាប់គ្នា ដោយសារ​ដណ្ដើម​អាហារ​» ។

ប្រជាជនវ៉េណេស៊ុយអេឡាជាច្រើន បានបង្ហាញ​ការខឹងសម្បា ចំពោះការឆ្លើយតបយឺតយ៉ាវ​របស់រដ្ឋាភិបាល ចំពោះគ្រោះមហន្តរាយ នៅក្នុងប្រទេសដែលកំពុងជួប​ការ​លំបាក​ដោយសារ​វិបត្តិសេដ្ឋកិច្ចរាប់ទសវត្សរ៍ដែលបានធ្វើឱ្យហេដ្ឋារចនាសម្ព័ន្ធ និងសេវាសុខភាពចុះខ្សោយ។

ទីភ្នាក់ងារ UN បាននិយាយថា ស្ថាប័ន​ត្រូវការទឹក​ប្រាក់ប្រហែល ១៤,៨៥លានដុល្លារ ដើម្បីបង្កើនជំនួយ និងជម្រកបណ្តោះអាសន្ន សម្រាប់មនុស្ស ៣០.០០០នាក់ ក្នុងរយៈពេល ៦ខែ៕