ប្រជាជនអាមេរិករាប់សិបលាននាក់ បានរងនូវ​កម្ដៅក្ដៅ​ស្ទើរ​ទ្រាំ​មិនបានដូចសីតុណ្ហភាព​​នៅក្នុង​ឡកម្ដៅ​​​ កាល​ពី​ថ្ងៃអង្គារ (ទី៣០ ខែមិថុនា ឆ្នាំ២០២៦) ខណៈដែលបណ្ដាទីក្រុងភាគ​កណ្តាល និងភាគ​ខាងកើត បានជួប​ប្រទះ​នឹង​រលកកម្ដៅដែលនឹងអូសបន្លាយរហូតដល់ថ្ងៃ​ឈប់សម្រាក​ចុងសប្តាហ៍ថ្ងៃទី៤ ខែកក្កដា។

ទីភ្នាក់ងារ​អាកាសធាតុជាតិ (NWS) បានព្រមានថា កម្ដៅ​ក្ដៅខ្លាំង​ក្នុងតំបន់​រាប់សិបកន្លែង អាចនឹងខ្ពស់​បំផុត​ ដោយសីតុណ្ហភាពនៅកន្លែងជាច្រើន នឹងមាន​លើសពី ៣៨អង្សាសេ ហើយ​សំណើមខ្ពស់ជំរុញឱ្យសន្ទស្សន៍កម្ដៅឡើងដល់ ៤៦​អង្សាសេ។

សីតុណ្ហភាព​ខ្ពស់​នេះ​កើតឡើងក្នុង​ពេលដែលសហរដ្ឋ​អាមេរិករៀបចំប្រារព្ធខួបលើកទី២៥០​ នៃបុណ្យ​ឯករាជ្យរបស់ខ្លួន និងខណៈពេលដែលប្រទេស​នេះ​ រួមជាមួយកាណាដា និងម៉ិកស៊ិក ធ្វើជាសហម្ចាស់ផ្ទះនៃការប្រកួតបាល់ទាត់ពិភពលោក (World Cup) អំឡុង​ពេលមានកម្ដៅក្ដៅ​ខ្លាំង។

ទីក្រុង Chicago ដែលជាទីក្រុងធំទី៣ របស់ប្រទេស បានប្រកាសថា ខ្លួនកំពុងបើកមជ្ឈមណ្ឌលផ្ដល់​ភាព​ត្រជាក់ និងបញ្ជូនបុគ្គលិកក្រុងឱ្យធ្វើការត្រួតពិនិត្យសុខភាពលើប្រជាជនដែលងាយរងគ្រោះ។

ទន្ទឹមនឹងនេះ រដ្ឋធានីវ៉ាស៊ីនតោន ត្រូវបានគេព្យាករថា នឹងមានសីតុណ្ហភាព ៣៧,៨អង្សាសេ ចាប់ពីថ្ងៃទី២ ខែកក្កដា ដល់ថ្ងៃទី៤ ខែកក្កដា នៅពេលដែលទីក្រុង​នេះ​នឹងរៀបចំការបាញ់កាំជ្រួច នៅទីលាន​ National Mall ដែលអ្នករៀបចំបាននិយាយថា នឹងក្លាយជាព្រឹត្តិការណ៍​ដ៏ធំបំផុត ក្នុងប្រវត្តិសាស្ត្រ។

NWS បានបញ្ជាក់​ថា មនុស្សជាង ៦០​លាននាក់ កំពុងស្ថិតនៅក្រោមការជូនដំណឹងអំពីកម្ដៅ​។ ទីភ្នាក់ងារសុខភាព កំពុងជំរុញឱ្យប្រជាពលរដ្ឋប្រុងប្រយ័ត្ន ចំពោះសញ្ញានៃជំងឺដែលទាក់ទងនឹងកម្ដៅ រាប់ចាប់ពីរមួលក្រពើ និងអស់កម្លាំង រហូតដល់សុរិយរោគ ដែលគំរាមកំហែងដល់អាយុជីវិត៕