​​ស្នូកឃ័រ​៖ ​ការប្រកួត​ស្នូកឃ័រ​ជើងឯក​ពិភពលោក បានចាប់ផ្តើម​វគ្គ​ពាក់កណ្តាល​ផ្តាច់ព្រ័ត្រ​ថ្ងៃ​ព្រហស្បតិ៍​ម្សិលមិញ ​ខណៈ​ជំនួប​រវាង​ខ្លា​ចាស់​ទាំងពីរ​នាក់ Ronnie O’Sullivan និង John Higgins កំពុង​តានតឹង​ក្រោយ​ស្មើគ្នា ៤-៤ហ្វ្រេ​ម​ក្នុងដំណាក់កាល​ដំបូង​។

​​ចាប់ផ្តើម​ដំបូង​ជើ​ងឯ​ក​ពិភពលោក ៤សម័យ​សញ្ជាតិ​ស្កុ​ត​ឡេ​ន John Higgins បាន​នាំមុខ ៣ហ្វ្រេ​ម​មុន​ពេលដែល​ជើងឯក​ពិភពលោក ៦សម័យ Ronnie O’Sullivan យកឈ្នះ ៤ ក្នុងចំណោម ៥ហ្វ្រេ​ម​បន្ទាប់​។ ​ការប្រកួត​រវាង​ជើង​ខ្លាំង​ទាំងពីរ​នឹង​បន្ត​នៅ​ថ្ងៃ​សុក្រ​នេះ​ទៀត ខណៈ​វគ្គ​ពាក់កណ្តាល​ផ្តាច់ព្រ័ត្រ​កីឡាករ​ទាំងពីរ​ត្រូវ​លេង​សរុប ៣៣ហ្វ្រេ​ម​។ ​ងាក​មក​វគ្គ​ពាក់កណ្តាល​ផ្តាច់ព្រ័ត្រ​មួយគូ​ទៀត​មិន​តានតឹង​ឡើយ​ ដោយជើងឯក​ពិភពលោក​ឆ្នាំ២០១៩ Judd Trump បាន​នាំមុខ​លើ​ជើងឯក ៣សម័យ​សញ្ជាតិ​វែ​ល Mark Williams ៧-១ហ្វ្រេ​ម​។ ​​ការប្រកួត​រវាង​កីឡាករ​ទាំងពីរ​ក៏​នឹង​បន្ត​ថ្ងៃ​សុក្រ​នេះ​ទៀត​ដែរ ខណៈដែល Mark Williams ត្រូវធ្វើ​ការងារ​ធ្ងន់​ប្រសិន​ចង់​ឈ្នះ Judd Trump ដែល​កំពុង​នាំមុខ​ដាច់​ដល់​ទៅ ៦ហ្វ្រេ​ម​នេះ​៕

​អត្ថបទ​៖​នាង សុភា​វុ​ធ