រដ្ឋមន្ត្រីរដ្ឋាភិបាលមួយ​រូបបាននិយាយកាលពីថ្ងៃអង្គារ (ទី៣០ ខែមិថុនា ឆ្នាំ២០២៦) ថា ប្រជាជនលីបង់ប្រមាណ ៤០០.០០០នាក់ដែលបង្ខំ​ចិត្ត​ចាកចេញពី​ផ្ទះ​សម្បែង​​ដោយសារសង្គ្រាម បានវិលត្រឡប់ទៅភាគខាងត្បូងនៃ​ប្រទេសលីបង់វិញ ដោយរំពឹងមានអ្នកមក​តាម​ក្រោយ​បន្ថែមទៀត នៅក្នុងសប្តាហ៍ខាងមុខនេះ ដោយការ​វិល​វិញ​នេះ​កើត​មាន​ឡើង​ដោយសារភាពស្ងប់ស្ងាត់នៃជម្លោះ​រយៈពេល ៤ខែ រវាងអ៊ីស្រាអែល និងក្រុម​ហេសបូឡា​។

តែ​យ៉ាងណាក្ដី​ មនុស្សជាច្រើននៅតែមិនអាចត្រឡប់ទៅវិញបាន។ លោកស្រី Hanine El Sayed បាន​និយាយ​ថា ចាប់តាំងពីខែមីនាមក មនុស្សប្រហែល ១លាននាក់ ត្រូវបានបង្ខំឲ្យ​រត់ចេញ​ពីផ្ទះ​សម្បែង​​របស់ពួកគេ ហើយមួយចំនួនធំនៅតែស្ថិតនៅក្នុងជម្រក ឬលំនៅឋាន​បណ្តោះអាសន្ន ដោយសារតែផ្ទះរបស់ពួកគេត្រូវបានបំផ្លាញ ឬមិនអាចចូល​ទៅ​រស់នៅបាន។

លោកស្រី​បាន​ឱ្យ​ដឹង​ទៀត​ថា ប្រហែល ៤០ភាគរយនៃអ្នកដែលត្រូវបានផ្លាស់ទីលំនៅ ឥឡូវនេះបានត្រឡប់ទៅទីក្រុង និងភូមិឋាន​របស់ពួកគេវិញ។ ចំនួនមនុស្សដែលស្នាក់នៅក្នុងជម្រកសមូហភាព បានធ្លាក់ចុះយ៉ាងខ្លាំង ដោយ​មកនៅ​ត្រឹមប្រហែល ១៣.០០០នាក់ ពីចំនួន​ ៣៧.០០០នាក់។

នៅ​ពេល​ដែល​​ទី​ជម្រកមួយចំនួន នឹងនៅតែបើកសម្រាប់គ្រួសារដែលមិនអាចត្រឡប់មកវិញបាន ​កម្មវិធីជំនួយ ក្នុង​នោះ​រួមទាំងការគាំទ្រជាសាច់ប្រាក់បន្ទាន់ នឹងបន្ត។ ចំនួនជម្រកបានធ្លាក់ចុះពី ៦៩២កន្លែង​ នៅពេលវិបត្តិឡើង​ដល់កម្រិតខ្ពស់​បំផុត មកនៅ​ត្រឹម ៤៧៩​កន្លែង​ ដោយមានមជ្ឈមណ្ឌលបន្ថែមត្រូវ​បានបើកនៅទីក្រុង​ Nabatieh សម្រាប់អ្នកដែលចង់ស្នាក់នៅជិតតំបន់ផ្ទះរបស់ពួកគេ។

សម្រាប់មនុស្សជាច្រើន ការវិលត្រឡប់ទៅផ្ទះសម្បែង​វិញ មិនមានន័យថា ជា​ការវិលត្រឡប់ទៅរកជីវិតធម្មតាវិញនោះទេ។ ជារឿយៗគ្រួសារនានា កំពុងទៅ​ឃើញ​លំនៅឋាន​ដែលរង​ការ​ខូចខាត ខ្វះ​អគ្គិសនី និង​ទឹក ហើយ​អាជីវកម្ម និងជីវភាពរស់នៅត្រូវបាន​បំផ្លាញ​ ខណៈដែលរដ្ឋាភិបាលកំពុងធ្វើការ ដើម្បីស្តារសេវាកម្មជាមូលដ្ឋាន និងពង្រីកជំនួយសាច់ប្រាក់ ការគាំទ្រការជួល និងកម្មវិធីការងារ។ តែ​ទោះ​ជា​យ៉ាងណានេះ​ក៏ដោយ បើទោះបីជាមានការលំបាកទាំងនេះក្ដី​ មនុស្សជាច្រើនកំពុងជ្រើសរើសការ​វិលត្រឡប់ទៅវិញ៕